操盤手札記 - 割柑人 2019年12月24日
【操盤手劄記】阿里續尋頂望220元 - 割柑人
阿里巴巴在港上市即將滿月，股價連日破頂。資料圖片 適中字型 較大字型
澳門回歸20年，阿爺卻未送上傳說中嘅禮物—澳門證券交易所，但就誇讚澳門係「一國兩制」典範。一國兩制喺人口2,360萬嘅台灣被拒，喺人口750萬嘅香港撞板，喺人口67萬（猶如觀塘）、國際化程度低嘅澳門就成樣辦。係咪成功，你話呢？
不過阿爺「揚澳抑港」昭然若揭。過往中央多番力谷上海、深圳作為國際金融中心，奈何滬深唔係一國兩制，資本賬未開放，人民幣未自由兌換。澳門雖然係一國兩制，但法制、專才在在不足，要做香港Plan B，大前提係國際信心！
上周末特朗普同習近平傾電話，之後放風，好快簽首階段貿易協議。美國貿易代表萊特希澤預告1月初簽，仲首次披露會喺簽署後30日生效，即係2月。貿協好事近，加上人行連日放水同1月有望降準，利好股市。
平安夜前夕，恒指開市突破28000關，但疲態顯露，收27906，升35點。聖誕假臨近，成交縮三成至656億元。睇技術走勢，恒指仍處上升通道，續挑戰通道頂28400水平；10天線升近250天線27500水平，成短線重要支持。
2020年將至，環球經濟「穩」字行頭，中國保六、美國大選、英國脫歐，各國求穩，央行幣策趨寬。市場憧憬人行1月降準，應付春節資金需求，及地方政府專項債發行。另外，國務院近日決定再推稅務優惠，零售消費股可望受惠。
具科技元素嘅阿里巴巴（9988），在港上市即將滿月，股價連日破頂。美股投資者轉倉嚟港股未停，至今轉倉625.6億元。市場憧憬北水未來可買賣阿里，唔排除資金提前部署。阿里現價208.4元，未有蟹貨下可望續尋頂，按區間幅度計，上望220元。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com
