廣告經綸 - 文廸晞 2019年12月27日
【廣告經綸】雪中送愛創造新商機 - 文廸晞
平安夜及聖誕節當日的尖沙嘴，人流疏落，聖誕燈飾簡陋了。資料圖片 適中字型 較大字型
今年香港到處氣氛差，聖誕節可謂大不如前，甚至沒氣氛可言。平安夜及聖誕節當日，我去過尖沙嘴及銅鑼灣，忽然發現少咗遊客的香港，原來剩低咁少人。聖誕燈飾簡陋了、少了，商場裏疏疏落落、餐廳食肆繁忙時間坐唔滿。連Sogo都從未如此冷清，在聖誕節當天下午三點，搭電梯唔使排長龍，竟然可以一架上曬。
聖誕節，買禮物送給身邊摰親好友和同事是常識吧。今年零售行業慘淡，例如珠寶首飾、家庭電器、潮流精品、美容護膚、科技產品這些原本「揀禮物」大熱之選，目測這類店舖只有平時三分之一客流量，有些幾乎拍烏蠅。
其實，消費意欲變差並不代表消費力大跌。所以，如果能夠捉準心態，突破常規，結果可能不一樣。正正由於景氣不佳，人們更需要愛、關心和鼓勵。送禮物，心思變得比以前任何一年聖誕節更重要。例如，做節日禮籃生意的，揀選的物品也更要揀手獨特，以往放些在街上隨時買到的中檔糖果、朱古力，今年就特地入啲香港冇得賣的英國、瑞士獨家品牌；以前放幾瓶士多啤梨和熱情果果醬，今年就搵啲加入剪成星星及聖誕樹形狀的橙皮及玉桂香料，務求帶來更獨特的聖誕滋味。
這些大時大節，商人們如可加多些額外心思去做產品及服務，去滿足及彌補一下香港人最缺乏的「好心情」。未來仲有幾個重點節日，例如年宵、農曆年、情人節、復活節，唔想拍烏蠅兼蝕老本，不如早啲棟高床板度下有乜好橋，看準這個「節日好想快樂又不夠快樂」時機，幫人創造一些「快樂的心思」，在如今一個悲情城市，不能再用「錦上添花」而必需改用「雪中送愛」策略才能殺出條血路。
文迪晞
mailto:heyadmen@gmail.com
heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com
