智取大市 - 晉佳 2019年12月2日
【智取大市】制度不公後患無窮 - 晉佳
香港人出抗爭，係制度不公帶結果。 資料圖片 適中字型 較大字型
本地地產股嘅問題，重點唔係近期香港政局變化，喺6月9日之前，本地地產股估值相對每股資產淨值折讓已經達到四、五成，市場給予低估值係源於增長力、競爭力老化，完全睇唔到地產股有擴充、增長派息嘅能力。
多年食老本、不思進取嘅習性，其一係源自制度上嘅不公，一班唔使出力就有人餵食嘅制度既得利益者變得慵懶，上進而未能公平得到機會嘅香港人就變得心灰意冷，係主權移交後日積月累嘅不公平制度拖累香港嘅寫照。既得利益者嘅慵懶加上阻止後浪上位，缺乏競爭，令生產力裹足不前，進而累及自己生意，造成惡性循環。
最近嘅典型例子就係民建聯，好明顯係制度上受惠嘅慵懶一族，最終要食嚇苦果。而香港人出嚟抗爭，亦係制度不公帶嚟嘅結果。如果制度公平、人人有機會，經濟成果能夠透過努力去換取，有如昔日嘅香港，至少不滿嘅市民數目，唔會以百萬計。
不公平，係香港問題嘅源頭，好可惜6月9日以後，主政者選擇進一步加大不公平，惡性循環只會令民建聯落馬事件一而再咁發生，區選唔使一星期，曾恃住政治優勢而忽視管理嘅港航就出曬事，商界亦會逐一步其後塵。主政者一日不醒覺，香港問題不可能解決，呢個先係真正嘅「攬炒」。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
