智取大市 - 晉佳 2019年12月9日
【智取大市】最怕小米都炒得起 - 晉佳
小米應該係藍燈籠，形成超過半年嘅潛伏底，連佢都炒得起，睇怕代表升浪去到尾水了。 資料圖片 適中字型 較大字型
港股目前算係升市定係跌市？對於恒指而言，充其量話佢係橫行市，假如閣下買嘅係新經濟、物管、運動用品、醫藥、或者近期嘅內房股，你就會覺得係升市。兩極化市況近年典型例子係2013至14年科網濠賭股熱潮，全城只得呢兩個板塊升，其餘股份點穴，不過當時買股票仍不乏升值機會。
以過往兩極化市況，從來都係強勢股由頭炒到落尾，絕對唔會有落後股接力炒上。即使物管、運動用品、醫藥股已普遍升到長期投資回報增長跟不上估值嘅情況，最終升浪仍集中喺呢啲板塊作結，爭取短期回報嘅話，以現況睇係不作他選。
參考對上兩次兩極化升市嘅特徵，值得大家留意。第一，為期比較短，兩次都係一年多就完成；第二，升浪終結往往喺年初出現。今輪兩極化升市大約由年初開始至今，如果重複對上兩次嘅特徵，有可能係明年初結束，出年2月開始嘅美國民主黨初選可能係轉捩點，如果拜登或彭博勝出，會較利好傳統股，資金可能逐漸由強勢股流出，再進行換馬部署。
瑞聲（2018）由低位升咗超過八成，呢隻中美科技戰最大受害者原來唔係呢次升浪嘅藍燈籠，藍燈籠應該係小米（1810）至真，後者形成超過半年嘅潛伏底，連佢都炒得起，睇怕代表升浪去到尾水了。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
