智取大市 - 晉佳 2020年1月15日
【智取大市】殭屍股竟然炒復活 - 晉佳
中國建材股價轉強，但負債超高，對股民是好投機的選擇。資料圖片 適中字型 較大字型
港股成交突破千億，恒指跟隨人民幣轉跌，跌勢唔算急，走勢已算不差。持有強勢股嘅話，另一個威脅係接連出現嘅配股抽水潮，日日總有兩隻，最新又有錦欣生殖（1951）股東減持舊股套現。反映增長股估值被拉高到遠高於市盈增長率1倍，對股東嚟講固然係套現良機。
資金離不開輪流炒作，近排新經濟股威盡，高位回吐一日幅度不大，似健康調整。個幾星期前水泥股曾經係最強勢周期股，但近日港股升勢強，水泥股逆市回吐落嚟，又唔覺得特別超買。中建材（3323）同海螺（914）都一度爆上，原因係中建材尋求到將其超高負債煞掣嘅方法，睇返過去9個月，淨負債由舊年初嘅1,921億人民幣降至舊年9月底嘅1,880億人仔，有形淨資產負債比率由9倍樓上急降至6倍左右，超高槓桿之下，有形淨資產喺9個月間急增五成！
市場期待中建材能夠趁行業好景繼續減債兼提升淨資產水平，一來可降低風險，二來減債等如減利息開支，有利他日盈利表現。中建材告別喪屍行列要天時地利人和配合，不過現況已足夠掀起重估潮，股價反應證明市場相信呢個故事，投機性買入係唔錯選擇，不過負債超高，真係好投機。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
