今日港股估計以逾千點跌幅去反映市場恐慌，投資者呢一刻唔會去計算實際經濟影響，只會因應恐慌程度同避險需求
去調整，任何誤差留返喺未來兩個月去修正。疫情始終會過去，市場正常化過程嘅長短，當然視乎抗疫進度。
根據港大嘅數據估算，人口係武漢超過兩倍嘅重慶，可能係疫症嘅重災區，去到4月，重慶可能每日新增15萬確診個案，一線城市亦達每日1萬宗。當然有目前嘅大規模防疫、假期延長、強制廣東省戴口罩，斷估數字最終比港大條數明顯低。諗到呢度，未來兩三個月會否再重創股市嘅另一因素，就係重慶會唔會遲早加入封城行列，甚至封埋周邊城市。係嘅話對經濟影響更大，投資者要因應情況有所預備。
另一個重點，係中國近年講到最巴之閉嘅大數據、人面辨別、AI科技，係咁厲害就好應該趁呢個時候show一下，加快堵截可能嘅病源，千祈唔好「講就兇狠，做就碌X」。
至於香港，為咗遷就同附和大陸，防疫措施似為大陸人做多過香港人做，高官執行能力令人一再失望。所以，香港人自己防疫自己做，千祈唔好靠政府。唔好睇小眾志成城嘅防疫能力，做得好，社區傳染就能避免幾何級上升。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
