睇小時圖，恒指先喺新年前黐住保歷加通道中下軸而跌，去到新年後跌破下軸、擘闊通道大跌，完未？僅僅6、7日就由天堂打落地獄。
大陸既然咁狠連成個省都封埋
，A股下星期一復市前，究竟中央有冇袋住招數等最遲星期日A股開市前使出？封省大刀闊斧，照計救市都要大刀闊斧，避免周一全線A股跌停，而觸發民企斬倉潮，好似疫症咁蔓延。投資者喪沽港股，似乎驚呢種斬倉恐慌多於肺炎本身，亦因為呢一刻冇得沽A股又怕斬倉潮，從而增加現金。
疫情最嚴重喺4月份，中央如何捱到4月難關都係一個難題。封完湖北省，之後再封重慶？肯定股市經濟更大鑊。定係先解封武漢周邊地區，然後疫情擴大先轉而封重慶？呢類因素睇怕令2月至3月市況會形成大型上落市。
一場肺炎，勢令人民死傷無數，從冷血嘅資本市場角度睇，卻將股市周期改寫，美國估計未必喺6、7月前向中國出大招，然後，好快就迎來美國大選，呢一刻只要股市捱得過呢關，就將資本市場安全期駁埋一齊，利好風險胃納。不過，過咗呢關再算。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
