操盤手札記 - 割柑人 2020年1月7日
【操盤手劄記】西環換帥保金礦 - 割柑人
新任西環坐堂駱惠寧係經濟學博士，估計將會打經濟懷柔牌，以保香港這個金礦。 互聯網圖片 適中字型 較大字型
2020年首個周末，西環上演「最是倉皇辭廟日」，曾稱「中環、西環行埋幾好」嘅西環坐堂王志民，被阿爺免職。王被炒魷，相信皆因反送中運動、區議會選舉錯判形勢孭鑊。下一個林鄭月娥？
林鄭被炒魷，係遲早問題。不過，睇習近平喺新年賀詞話「真誠希望香港好」，跟手換走王志民，就算換湯不換藥，亦似調整對港路線。新任西環坐堂駱惠寧係經濟學博士，前年來港招商時話香港係一座金礦，估計將會打經濟懷柔牌，以保金礦。
中美首階段貿易協議又現轉折，特朗普喺除夕搶咪宣佈，將於1月15日喺白宮同中方簽署協議，但中方至今未作回應。據講，中方原定月初赴美，現時惟有更改行程，1月13日啟程，1月16日回程。話時話，就算簽成協議，但遵守協議比談判更難！
雖然中美可望下周簽署貿易協議，但美伊局勢升級，避險情緒升溫，周一港股借此作為震倉藉口，回調0.8%，收28226。恒指由12月4日低位25995升至上周五高位28883，累升2,888點，借勢調整正常，只要守穩250天線27580，中線向上形態持續。
港交所（388）踏入2020年即見發力，連升3日，累升6.2%，動力嚟自美國上市中國概念科技股洽商來港上市。中概股龍頭阿里巴巴（9988）舊年11月尾回港第二上市，股價至今升近兩成，跑贏大市；而且美國股東調撥股份來港，在港股東基礎大增。
阿里珠玉在前，據報網易（美：NTES）、攜程（美：TCOM）已洽商港交所來港上市，百度（美：BIDU）亦對來港上市進行內部評估，並已在港招聘對接機構負責人，進度可能比網易、攜程更快。港交所食住中概股回歸條水，不妨留意。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com
