上星期，本欄指出，港股反彈已完，「國難財」已發完。港股之後高見兩萬八，然後反覆向下。理據是半個月反彈太
多，已超過之前近半年嘅水平，呢個方法好處係唔使自行判斷事件究竟係利好定係利淡。
以武漢肺炎為例，由12月開始知有呢個病，港股大部份時間都係升，當佢冇到。當然，市場嘅大方向離唔開真實情況，如果人人冇工開、出街染病有機會死，咁買股票贏錢都冇用，最後股價都要跌。現時股票處於轉折階段，由2月低位反彈可見，市場傾向覺得今次疫情的時間點，等同2003年沙士期間一樣，疫情係一次過，指數唔認為長遠會有影響。
武漢肺炎、疫情蔓延，有一半係天災，有一半係人為。天災的一半，就由醫學專家去解決；人為嘅一半，就係政府點樣處理疫情，究竟係處理得當經濟再起飛，定係變成人禍？要預知未來，需要走入過去。今次處理嘅係政府，政府有內部規矩，處理危機手法會有慣性。
本欄認為，政府處理今次疫情，可以參考應對舊年區議會嘅手法，因為兩者背景相同：決定係咪舉行區議會選舉前，政府覺得親政府派會大勝、假新聞誤導、有外國勢力介入、將反對者同病毒視為敵人。疫情初期，則不斷有人放風話仲弱過流感、傳媒炒作之類。
近日確認爆發之後，政府嘅反應由如出一轍。舊年區議會選舉之前，整個政府陣營嘅統一口徑，就係「民意逆轉」。今次武漢肺炎呢？就係「未來14天是關鍵」、「疫情受（監）控」。
然而，區議會嘅事實係，民意冇逆轉到；至於武漢肺炎，暫時每日有新確診個案。區議會就係用議席衡量表現，而疫情對經濟影響就用股市點數去計算。如果兩者最後走向嘅軌跡係一樣，可能要有心理準備面對一次衝擊。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.entertainment.appledaily.com
