資料圖片
孫柏文以前做投資講座講者時，有時會有問答抽獎環節。其中一條我最鍾意問嘅問題就係：「大家都聽過沙士價，
咁根據一周計一次嘅中原指數，香港樓市究竟喺03年邊個禮拜見底？」問咗咁多年，都係冇觀眾答啱過。
武漢肺炎消息不絕，令好多財演行家，喺對上兩周寫樓市會否再現「沙士價」嘅文章，清一色話唔會。佢哋嘅分析，我覺得全部都係唔明當年點解出現「沙士價」。首先，唔係因啲人驚隻病，所以終極賣樓（淘大除外）。大家要記得，97年所有香港人，都信「我至叻」。我哋做嘢不但世界級，重要係領先世界，迷信成個體制嘅利害。點知由97年開始，政府一次又一次證明唔掂。直至03年，透過沙士一役終極證明連最基本，防止傳染病都做唔到時，徹底令香港人醒覺。原來用中共嗰套「港人治港」去延續殖民時代獨裁唔work，所以一注獨沽啲樓。
中央都覺原先嘅諗法唔掂，所以就逐步取締「港人治港」，越來越幹涉，埋下「反送中」嘅計時炸彈。我最驚嘅就係就算你幾「黃」都好，如果今次武漢肺炎真係令全國人民對中共管治嘅信心全面崩潰，中共「支爆」，香港樓或香港資產會點？中國冇中共，有冇plan B？
香港樓市喺03年邊個禮拜見底？就係當年七月，圍立法會推倒廿三條立法嘅嗰個禮拜，香港人終於證明，中央、政府亦接受，原來香港人有底線嗰刻。大家執生。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com
