【收市閒情】真正港產片一去不回 - 千頌C
黃百鳴近日受訪時話：「只要拍電影就拍電影，唔好理咁多政治因素就得。」但如果真係唔理政治因素，根本就入唔到中國。資料圖片
1：今年香港電影金像獎預告片，短短三分鐘，講出香港人2019年到今日嘅故事。最令我震撼一句係，「知唔知最恐怖嘅犯罪現場喺
邊度？」佢唔用對白去答你，佢用一架車牌831嘅車，衝入地鐵嘅畫面去答你。
2：一條預告片，話畀全世界聽，香港有一班電影人，努力堅持住香港真正核心價值。不過佢哋近來咩環境呢，同電影界朋友傾開，劈頭第一句就係「電影呢行真係好靜，連古生都話冇戲開。」
3：搞笑嘅係，黃百鳴近日受訪時，突然sell本土，佢舉嘅例子，係近年嘅《葉問》……其實係合拍片嚟嘅。佢又講《家有囍事》，2009嗰套我睇過，我真係睇過呀，我會形容為扮港產片嘅中國片。
4：黃百鳴又話，「只要拍電影就拍電影，唔好理咁多政治因素就得。」如果要真係唔理政治因素，根本就入唔到中國。要入中國，就要政治正確。
5：至於本來拍好多真港產片嘅彭浩翔，上年初係威係勢話要開拍《鹿鼎記》三部曲，之後仲做埋護旗手，果然人望高處呀！最新係點？上年10月後就冇新聞冇進展，相信呢部《鹿鼎記》結局，可能只係兩個字：Total loss！
6：其實一切都要多謝範冰冰，自從佢單偷稅漏稅風波後，中國政府對影圈一切從嚴。華誼兄弟因此損失慘重，於是上年7月，隆重宣佈：「我要成立黨委」，強調要積極探索「把黨建工作融入到影視內容創作的各個領域」。長此下去，戲只會越來越垃圾。
7：中國電影業有幾大鑊呢？上年年底，黃曉明、Angelababy、迪麗熱巴都已經話冇戲開。下遊戲院方面，武漢肺炎下停業80幾日，大量戲院執笠，單係第一季度已有2799家影院類相關企業註銷或者吊銷。
8：僧多粥少，中國電影業已一如油價盤崩潰，自己唔蝕都偷笑，幾時會預你香港人賺？舐共既然沒有商機，真正港產電影業係咪真係會返嚟？朋友話：「老闆級多數都真心舐共㗎喎！」
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://s.nextmedia.com
