【收市閒情】家道中落要慳住使 - 千頌C
中國吹緊風向，希望鼓勵大家儲多個錢，唔好使錢。 資料圖片
1）中國與世衞就武漢肺炎扯貓尾，累全球攬炒。當歐美仲停擺，中國就逐步解封，講白啲係早死早享受，家陣仲威到吹捧炒復蘇。
2）好多人就話：「中國人困住喺屋企咁耐，抑制咗幾個月嘅消費欲一定會
大爆發，報復性消費指日可待！」
3）果然，唔少名牌復市，唔少中國大媽，就如一隻餓咗十日嘅獅子聞到血腥味一樣，衝落舖掃包包。Herm箢s廣州店月中重開，單日營業額達破紀錄1,900萬人民幣！Louis Vuitton中國分店，於今個月首三星期，營業額比上年同期暴增五成！化妝品代表L"oreal亦都報捷，話3月中國銷售錄增長，相信4月可以再錄5%至10%增長。
4）條數係好靚嘅……好似。不過，維唔維持到係一個問題。首先，中國人集慣去外國旅行時掃貨，據大摩數據，上年中國人去外國掃貨，為LVMH、Kering、Richemont貢獻32%至44%收入，比起中國本地貢獻約一成至17%多一截。不過，𠵱家飛唔到去外地買包包，咪喺屋企附近買。然後呢？有錢咪有然後囉。
5）據市場調查機構貝恩，中國人2019年貢獻全球奢侈品市場35%，更加為行業增長貢獻九成。最新貝恩又發報告，預期奢侈品市場規模將萎縮15%至35%，全年損失預計600至700億歐元。
6）問題係，中國經濟差係不爭事實，首季GDP按年錄衰退6.8%，較市場預期的6%為差，歐美未復蘇，都冇客，中國復工來都係托。
7）最近有份研究報告，話有55.5%人內地人表示，未來3個月「更願意儲蓄」。
8）呢份報告係央行做嘅，唔好理有幾多真係調查返來，但有一件事一定係真，就係中國吹緊風向，希望鼓勵大家儲多個錢，唔好使錢。
9）中國無啦啦叫你慳住使？令我幻想到一個老土情節，一個土豪走去個仔講：「你仲買嘢？家道中落呀！衰仔」
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://s.nextmedia.com
