【智取大市】標普500可怕警號 - 晉佳
美股標普500指數喺高位呈現擴散三角形，百年來都未試過，係強烈利淡訊號。資料圖片
睇月線圖，標普500指數喺成交增加、高位大幅波動之下呈現擴散三角形，可謂百年來都未試過，本身係強烈利淡訊號。其實喺六、七十年代，標普500都做過擴散三角形，之不過
當年個三角形行咗接近十年，同今時今日兩年幾之內喺歷史高位附近急跌形成擴散三角形情況頗為不同。論形態，今時今日更貼近傳統擴散三角形，反映市場情緒極為不穩狀態，營造嘅形態越長線越具參考價值。
標普500目前正正反彈到去月線圖保歷加中軸位置，向來係跌市反彈嘅臨界點。例如87股災後，大跌市指數快速見底，但反彈至中軸亦見阻力，喺中軸以下爭持成年，先至展開下一輪升勢。至於08年5月，指數反彈到中軸即見阻力，之後就係金融海嘯。上述只係例子，唔係次次咁大鑊，只不過月線保歷加中軸往往係一個幾好嘅中轉站指標。借古鑑今，只要標普500升至明顯高過中軸，企穩兩三個月，先可以話正式解除危機。相反，如果標普500快速跌至明顯低過中軸，就要小心，過往大部份美股大熊市，普遍出現呢種情況。
餘下個幾兩個月時間，不妨以輕倉觀望。出現悲觀情況嘅話，一段時間內切忌貪平撈底。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com
