【金手指】價值投資法見谷底？ - 孫柏文
股神畢菲特旗下巴郡，雖坐擁千億美元現金，都喺武肺冧市後繼續減持股票。
資料圖片
孫柏文相信，「Rubbish in，Rubbish out（垃圾入，垃圾出）」係大家可能聽過嘅一句老外金融圈說話。如要解讀，就係當分析過程，將垃圾級嘅數據輸入，得出
嘅結論，都係垃圾，廢物，冇用。
今時今日，除咗央行瘋狂印鈔外，有咩前瞻性數據可靠的？由武肺確診、死亡率，到啲公司還債、現金流預測，真係當真咁攞嚟估資產價格走勢，足以致命。基本分析，喺對上十幾年嘅量化寬鬆世界，已被打柴。呢期睇到股神畢菲特嘅巴郡，雖坐擁千億美元（冇息的）現金，都喺武肺冧市後繼續減持股票。唔知係咪巴郡股價，3月後嘅反彈遠遜標普500指數（當然，都係靠嗰幾隻科技股）。令我開始見到啲鬼佬財演開始話「畢菲特時代結束」嘅文章。
如果論一個投資法嘅谷底，呢個現象應該都算係。唔通已冇乜用十年嘅價值投資法，將會好快成為最搵錢嘅分析方法？我，只能期待。
最後，睇新聞話金價「逼近」歷史新高。呢個其實係觀點與角度嘅問題。因為除美元外（即港元外），用其他貨幣計價，不論係地球最穩嘅瑞士法郎，或宇宙最強嘅人民幣，通通升穿2011嘅高位，全部歷史新高。今轉金銀有排升，當你睇唔透世界大事時，真係要入終極避風塘匿匿。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://s.nextmedia.com
