【智取大市】黨的睿智媲美雞排妹 - 晉佳
市況一日未瓜，就要學「台灣省」的女股神雞排妹炒股，只吃魚身，不吃魚頭及魚尾。資料圖片
港版國安法辣到有曬預期之下都全球震驚，究竟偉大嘅黨仲係咪覺得有險可守？
黨需要香港嘅好處，大家睇通曬，資金自由進出嘅金融大賭場、容許南下資金泊車嘅物業市場，要留
低嘅嘢好明顯，金融市場嘅陰霾反而因此掃去。驚外資撤資？未來外資機構喺香港分部對住大陸一個樣，總公司對住美國又另一個樣，政治正確食兩家茶禮祈求相安無事。反正金融市場早就搬上網絡世界，一般外資只需留返「省仔」喺香港境內保持運作、足夠服侍中國就OK！因此呢一刻不涉及撤唔撤嘅問題，要撤嗰部份老早撤咗，要切嗰部份亦都切咗。
講到尾，黨覺得香港個魚身仲有用，咪淨係留返魚身咯，魚頭魚尾丟咗去，理得你係咪dead body。有險需要守嘅，似乎唔係金融市場，未來可能係BNO引發嘅物業套現潮，不過，到時㩒個掣央企進駐香港，林鄭咪多個「香港需要更多專才嚟香港」嘅理由，令物業「貨落強者」，最緊要魚身還在。
講返納指，無驚無險6月喺高位報收，𠵱家開始拉高月線保歷加上軸甚至出現拋離上軸嘅情況，可能進入千禧年嗰種癲況。市況一日未瓜，受惠疫情嘅科技股就會一個月癲過一個月，炒風唔敢估頂。要控制風險，就以龜速逐少逐少縮注，呢個時候，要學「台灣省」的女股神雞排妹炒股，只吃魚身，不吃魚頭及魚尾。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com
