操盤手札記 - 割柑人 2020年11月16日
操盤手劄記｜數據中心大茶飯（割柑人）
萬國數據
金融戰殺到！美國總統特朗普打緊大選官司之際，不忘對付中國，下令封殺31間中國企業，指有軍方背景，禁止美國人投資，被視為中美金融市場脫鈎之舉。白宮易主，會唔會變？唔好忘記，之前強制中概股除牌嘅《外國公司問責法》，係共和、民主兩黨議員一致通過嘅！
禁令涉及29隻港股，連三大電訊商都上榜。中移動（941）股東中，唔計母公司，五大機構投資者全屬美資；聯通（762）五大機構投資者亦全屬美資；至於中電信（728），五大機構投資者4間屬美資。睇番2018年美國制裁俄鋁（486），俄鋁7個交易日瀉七成，都咪話唔擔心。
上周五中移動、聯通、中電信分別跌5%、6.6%、7.8%，周一再跌3.7%、1.8%、4%，惟電訊股佔恒指比重唔大，影響有限。恒指收26,381，回升0.9%，短線上落格局，阻力位睇前浪頂26,782，支持位睇前裂口底25,799。惟恒指7個交易日4枝陰燭，高開即有沽售，有派貨之嫌。
美國上市嘅中概股，已加快搵定後路。中國最大中立數據中心營運商萬國數據（9698），就剛喺月初來港第二上市。「十四五」規劃以「科技自立自強」作為國家發展嘅戰略支撐，數據中心係科技發展嘅根基，勢將加大投資，加上數據處理需求趨增，萬國數據可望分羹。
萬國數據客戶涵蓋雲服務商、網絡商等，包括阿里巴巴（9988）、騰訊（700）、華為等。據艾瑞諮詢數據，舊年中國數據中心服務市場總收入為334億元人民幣，營運商中立市場佔56.3%，預計2019至2024複合年增長率為31.8%。萬國數據內地市場佔有率達21.9%，且處於增長期，將於周二公佈季績，不妨留意。
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
操盤手札記 - 割柑人 舊文
來源 source: http://hk.news.appledaily.com
