智取大市｜天貓淘寶大鑊過螞蟻？（晉佳）
天貓盈利增長放緩，更面對拼多多的挑戰
記得10月初時講過阿里，話佢短線勝長線，結果威咗大半個10月之後，近大半個月可謂進入惡夢，螞蟻上唔到市，被政策突然打壓令估值受創，阿里少咗個增長點，剩返雲業務、菜鳥、餓了麼，未來增長肯定慢一截。
阿里估值低
，仲有一個更大原因。以天貓淘寶為主嘅阿里核心商業業務，經調整EBITA增長持續慢過收入增長，以上一季為例，收入升29%，經調整EBITA升19%。網購收入始終會因為市場飽和而增長放慢，長遠盈利增長可能低過一成，啱啱雙十一GMV升26%，其實一啲都唔勁。呢方面似乎係結構性問題，強如阿里嘅執行能力亦難以解決，否則一早解決咗。
至於京東，零售收入增幅同天貓淘寶其實相若，但京東舊年開始轉盈，高經營槓桿推動盈利更高速增長，令天貓淘寶相形見絀。天貓淘寶同時面對拼多多競爭，後者收入已相當於天貓淘寶一成左右，但年增長89%，未來威脅更大。
天貓淘寶向來以海量產品種類吸引消費者，產品差異化難免做唔到規模效應。拼多多嘅上位顛覆咗呢種玩法，以產品優惠去吸引消費者集中狂買同一款產品，從而產生規模效應去壓低成本同售價。對阿里嚟講更大鑊嘅係，拼多多上市以來首次轉盈，即係未來可以慢慢同你打。天貓淘寶想透過削減成本去催谷盈利？隨時會將市場份額斷送畀拼多多，處於兩難局面。
當年騰訊亦曾經出現過廣告收入增長停滯嘅憂慮，點知手遊業務跑出，其他對手至今望塵莫及，成功避免落得今日阿里嘅尷尬局面，股價亦比阿里為強。雖然阿里始終係阿里，但連阿爺都鬱佢，呢場保衛戰就變得相當難打了。
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
智取大市 - 晉佳 舊文
來源 source: http://hk.news.appledaily.com
