唔打算賣樓 就應該早日表態
星期一早上有老友到筆者公司吹水，期間見到有物業代理WhatsApp給我，問我們其中一個物業要價幾多，我立刻回覆話未有打算出售該物業，多謝費心。老友唔明白，點解唔叫物業代理先攞一個價，或者是好好價，唔需要推得咁快。我話唔打算賣就唔好浪費別人時間，阻住他們搵食，老友話我
做錯，我則 認為做生意各施各法，沒有絕對啱抑或錯。
在新冠肺炎疫情之下，很多業主，尤其是只得一個單位的業主都犯了一個毛病，當有物業代理話有客人有興趣他的物業時，會叫業主出一個價，不少業主根本不打算賣，但又很想知道他們的單位可以賣多少錢，於是回覆物業代理，叫他的客人出一個價睇下先，物業代理會亦會回覆一個價，不過，一定會大幅低於市價。業主當然唔開心，我曾經聽過有業主要去EAA告那位物業代理，其實告甚麼，是業主自己放棄了主動權，他唔出價，物業代理就有權主動出價，所以，唔打算賣樓，千祈唔好叫物業代理的客人俾一個價，後遺症是很大。
其他物業代理知道有業主心急願意低價賣樓，出價只會愈來愈低，幾個月之後，業主甚至會說早知當日一早賣樓，最後真的會以低價賣走不打算賣的單位，這招叫打樁式鋤價，但如果業主不叫物業代理俾個價，就不會出現一個定點位，沒有定點位就不能打樁。
湯文亮專欄 舊文
來源 source: http://www.am730.com.hk
