笑到最後|台積電股價破百後的睇法（高明）
台積電只要保持技術領先，實長做長有。繼續冇目標價，持有到2024年至檢討。
八月底，高明推介台積電(TSM)，當時股價79美元，上周二升至最高102.44美元，升幅超過29.67%，再一次證明，如果想知道未來發生咩事，就應該睇本欄。
美國總統
大選未有結果，美國傳媒擁立拜登，成為21世紀黃袍加身。高明心入邊曾經諗過，如果拜登真係當選，台積電會唔會冇運行呢？
結果，之後新聞顯示，台積電本身晶片嘅單唔單止排到2021年，甚至傳出台積電產能用曬，蘋果晶片訂單接唔曬，要分畀三星。股價亦隨之上升，同期，普遍科技股浮浮沉沉，晶片股例如AMD同英偉特都無法破頂。
疫情之後只係炒緊一個概念，就係產品嘅供應短缺啲，定係鈔票短缺啲？
經過左奧巴馬年代嘅量化寬鬆，我哋明白到量寬有幾件事情會發生：高度借債發展嘅公司唔會死、收益率會跌到有咁低得咁低、任何有穩定收入嘅公司都會成為市場上邊嘅稀有品種。
霸權嘅來源，就係你唔用佢，冇第二個揀，所以局住要使用，最後令到公司嘅收入非常穩定，年年都有增長，過去升幅強勁嘅SaaS就係呢個原理。
至於台積電，晶片嘅技術喺過去十年超越其他所有工廠，更加因為佢冇消費產品，出現獨立性，初步產生技術造成嘅壟斷地位。
美國對中國晶片進行禁運，令大家明白極細納米嘅戰略地位，直接畀侵侵吹起左晶片嘅估值。Intel英特爾宣佈7納米晶片要延期，原本龍頭技術青黃不接，市場出現移位，加上蘋果亦都離棄英特爾，設計代工分家模式取代一站式晶片工廠，台積電喺呢個歷史夾縫之間成為晶片界中遊嘅霸主。
而5納米嘅晶片，唔係㩒個掣就有，相對美元真係㩒個掣就印，台積電有稀少性，據報3納米2022年下半年量產，2納米最快2023年量產，相對Intel延期後約2022至2023年出7納米，美國邊位做總統，都唔會開倒頭車，台積電只要保持技術領先，實長做長有。繼續冇目標價，持有到2024年至檢討。
高明
https://www.facebook.com/bigricetea
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
笑到最後 - 高明 舊文
來源 source: http://hk.news.appledaily.com
