疫情亂世窮得一味講金
又年尾，又盤點。疫情的一年，香港有甚麼特別的廣告、「劃疫情」的廣告，值得記下表揚討論？
老實講，係冇，冇乜嘢好盤點。有邊個品牌，有好好的為香港，做過一個有深度有分量的疫時代廣告？
冇。
一個都冇。促嚇銷嘅，大把，講兩句疫情，又sell你買嘢。齊上齊落，用心攜手互勉
的，高汁的大片，冇。
在此寫過，外國卻有大把，Nike的、Bose的、歐洲老麥的、IKEA的……都是相當有心的廣告創意，希望大家在疫深火熱中，苦可以輕一點，膊頭有人拍一拍。
你可以說，大家都冇心機、又不想花錢，生意唔好……咁，外國的品牌又做了、又做到？說穿了，人家做用自己招牌與眾打氣，一定係講心唔講金(住)，困難日子，共渡時艱，一是自覺要履行企業社會責任，二是對將來有希望，三是形象工程也可順手攞分。
香港的品牌，除了問香港人要錢時做廣告，已很少純和你講心。叫你借錢吧、買嘢吧的多，你認為真有企業社會責任、對將來有積極希望的有幾多？
廣告人語 - 畢明 舊文
來源 source: http://www.am730.com.hk
