笑到最後 - 高明 2021年1月17日
笑到最後｜虛擬貨幣與虛擬移民潮（高明）
2021年，有KOL撰文表示，繼續對比特幣持懷疑態度，一定不會投資比特幣。正如本欄之前文章「一注獨贏買薑濤」所講，比特幣可能真係騙局一個，但係傳統財經界提供唔到願景，點樣賺得多過呢個騙局，結果仍然係推介橫行十年嘅港股，繼續用同樣精神面對未來10年，肯定不進則退。
另一個要跟隨時代轉變嘅概念，叫做移民。剛剛過去一個星期，全球已經出現社交媒體移民潮，由WhatsApp 轉Signal，由Facebook轉MeWe。上一個世代，大家興高采烈迎接社交媒體，覺得係推倒舊有霸權，最後發覺科技企業只係借助大家嘅力量，成為新霸權。今次由科技巨企，移民到科技細小企業，普遍心態理智得多，就係用新一代程式去制衡科技霸權。
可見嘅將來，社交媒體移民潮，將會有如電訊商轉台一樣，電訊商約滿轉台拎迎新優惠，社交媒體就倒返轉，社交媒體上客突破critical mass後成為新霸權，壓迫用戶，包括壓低觸及率以及審查內容，用家冇癮之下集體轉台。或者發展到某一日，社交媒體要收用戶月費，不再出賣客戶私隱牟利，用戶先至唔需要再玩私隱捉迷藏，純粹因為社交媒體功能及技術作選擇，到時就唔係移民，而係轉台。
唔同環節嘅移民，其實一早已經出現。早兩年開始，已經有無數網站同文章，介紹大家點樣開離岸戶口。人可能冇離開度，但係資金已經率先離開。
再上連登望一望股票post，下一代炒港股嘅已經大減，但係賭性永遠唔會消失，更加多人已經轉炒美股，投資上移民。高明都經歷過幾個港股牛市，港股嘅困難，在於市場太過單一，會計佬、條例佬、幕後佬玩港股可能得心應手，喺呢三方面唔係專家嘅人，炒港股就蝕章，更何況，近年港股加入國情概念，令到上述三者都變成閒角。相對而言，美股市場較闊，包容性較大。
人濟關係、財富儲存同埋投資搵食，一早已經移民，到今時今日，人喺邊只係移民嘅一少部份。退一萬步，過去好多人拎外國護照、資產在外，然後繼續在港發展，咁又算移民定回流？近年趨勢，只係將移民呢個特權平民化、去中心化，情況有如Bitcoin，大家都可以印鈔（掘礦）、又可以縮表（忘記密碼或掉咗隻harddisk）。
新霸權取得權力後不斷中心化，失望嘅人不斷搵方法去中心化，世界發展向兩邊扯。覺得移民等同去搬磗、洗大餅，呢種思維等同十年前話bitcoin係騙局。唔想行其他人條舊路排隊尾，真係要思考點跳出前人訂嘅框框。
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
笑到最後 - 高明 舊文
來源 source: http://hk.news.appledaily.com
