士佳說 - 張士佳 2021年1月20日
【#士佳說 】張士佳：每日打仗咁
【#士佳說 】張士佳：每日打仗咁
大市一邊升，有持貨的朋友，個心十五十六，又怕利潤不保，又怕錯失良機，像昨日開市不久，有幾個同學不約而同在群組討論沽期指對沖，我即時制止，我話沽期實夾死，如果你係股壇老雀，你應該知道呢D泡沫市，臨尾升的主要不是你持股，而係一些無升好耐的冷門藍籌，所以持股沽期指實蝕章。
我做的是相反，前晚美股無市，昨日竟然開140多點的上升裂口，最近狂升但十幾日都未開個上升裂口，昨日突然間開裂口，唔係煙花爆升就係高開低收（唔好以為我呢句係廢話），我等佢話我知，由開市升到29100附近，即升多100幾點，煙花爆升機會較大，止蝕也不過是百幾二百點，如中止蝕，則可斷定多人中招，可沽股票了，所以29100水平低風險入市位是也。
我不是100%持股，最快的補貨方法是揸期指，我29088及29110分兩注買入，補齊貨等大市爆發，同時吼個股急升驟回時，平手上持股。
跟住我見到升既係#941，#5及一眾內房股為主，我就知道自己無做錯，大家睇睇手上有多少內房股啊，市升未必太關你的股事，你的股係升，但無個市升咁多。
我手上持股已經算幾爆，但整體都唔夠個市爆，我見港交所急升驟回，減港交所，見我持貨最重的#3800到$2回，我又減一邊持有期指，一邊將第一梯隊轉去一些不相關的第二梯隊像煙，奶，教育，模具，氫咁，沽二買一，直到大市升到29836，升到1000點了，我唔諗了，平期指好倉，呢D整數，我好敏感，唔理了，你升二千點，三千點一日喇，唔關我事，我呢種方法與持股，沽期對沖剛好相反，係揸期怕被大市升甩，再伺機沽股降風險，一樣係減持，但係效果完全唔同，先增再減，係順住個時勢去做，唔係逆個市勢去沽期指，去到升一千點，睇定曬，應該估計股票都沽左，才開始平期指，抵博喇，咁當然，如果昨早持貨已經100%我未必會噉樣做。
期後回落，我就吼反彈，補回#388，#3800，呢兩隻出陰燭我就會落車，並將散落在先前不同個股的注碼，弄集中，臨尾升籃籌，我盡量將注碼放籃籌或不關事的，太熱門的中價股，我反而走多，邊D藍籌我吼，騰訊昨日早段強橫升到673.5，卻倒跌收場，如你能夠陽升穿頂，我吼，港交所一樣，你3000億成交，做枝長上影，你升穿525我加，行完一個周期（以為係一個周期，其實只係一天，哈哈）我走了不少貨，偷了些位，賺了一天期指，又到今日應付另一個患得患失的日子了。
舜宇#2382，#6098（未來藍籌）通通都靚，但記著3000億成交，1000點升幅，要我買買買，不可能，買一沽二，等大市正式回調，再順勢沽多些。如果有一日開市時間你見我在大浪灣同小朋友玩緊浪，你知道我一定係冇曬貨，然後你串我，話我錯過咗呢個“發達良機”喎，SORRY，有錢有閒先至係我嘅目標，其他？I Dont Fxxxing Care！
士佳說 - 張士佳 舊文
來源 source: http://skycheung.weebly.com
