笑到最後｜又到科技股Solo時間（高明）
笑到最後｜又到科技股Solo時間（高明）
科技股大旺，今年情況繼續，只係活動範圍稍為大啲，各國壁壘支持一眾科技增長，情況不變。
近日睇臉書（FB）回憶，正常呢幾個月，都會去咗旅行，想當年一般淡季都有平機票，千零蚊已經可飛一轉日本。明明上述只係好近
期發生嘅事，但因為各國隔離政策，而且亦都睇唔到幾時取消，短線平遊似乎已經成為歷史。朋友屋企人曾做航空公司，星期六日活動就係即日或兩日一夜高雄，而家睇嚟都已成為奢侈品。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
旅遊已經成為集體回憶，或者咁講，由平民觸手可及嘅活動，再次重回有閒階級嘅玩意。短線4日遊，伴隨兩國合共超過30日隔離，一般打工仔已經冇可能參與。就算係有閒階級，亦都要夠年輕力壯，先捱得過長時間隔離。半年前左右，市場吹風講重啟經濟概念，當時高明都信好快可重回疫情前，但係近期走勢，發現現時已經係「正常」，即係可以返放工、維持本地消費，係咁多，類似情況，相信至少維持多5至10年。即使有如新加坡等國與病毒共存，就好似感冒無法清零一樣，不如由得佢，但佢一個共存，其他唔共存，結果都係一樣。
大炒爆一爆再大炒
Status Quo現況不變，即係贏家繼續贏，輸家繼續輸，所以你見到今年8、9月，科技股再炒起嘅情況，竟然同舊年一模一樣，更加因為蘋果(AAPL)今年應該9月可以公佈新機，唔使拖到10月，亦都因為傳聞而炒起一啲附帶蘋果而生嘅公司。
實情就係，舊年因為無法返工而要改用軟件，科技股大旺，今年情況繼續，只係活動範圍稍為大啲，各國壁壘支持一眾科技增長，情況不變，你可以預期每年下半年科技股就大炒，然後炒過龍爆一爆煲，過幾月又炒。
究竟啲錢同生意邊度嚟？減少咗旅行開支，就係最大資金來源，除咗去Donki 當去日本旅行之外，股市亦都由投資變成景點，睇股評係旅遊書，港股係Staycation，美股就係真正旅行。
好多人問我今年有冇去旅行，有，我晚晚都去。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
