操盤手劄記│北極熊打亂央行陣腳（割柑人）
操盤手劄記│北極熊打亂央行陣腳（割柑人）
央行進退失據，睇上周聯儲局鮑Sir出席國會聽證會嘅表現可見一斑。
戰、疫、息仍然困擾市場！上周五，港股再顯「熊」風，跌2.5%熊霸亞洲；歐美方面，泛歐Stoxx 600指數跌3.6%更熊，美股三大指數
則跌0.5%至1.7%，反映中概股表現嘅納斯達克金龍中國指數跌5.4%最熊，港股ADR比例指數低水1.8%。藍籌中槪科網股ATMJN，美國股價分別較香港低0.7%、2.3%、2.9%、5.3%、0.5%。滙豐（005）英、美股價，更分別較港低5.6%、5.2%。「北極熊」俄羅斯則已休市5日。
美股、外匯、加密貨幣免費即時報價，自選投資組合獲取相關新聞提示。
自2月24日俄羅斯向烏克蘭開戰，至今已12日。上周五，烏克蘭南部有「歐洲最大核電廠」之稱嘅Zaporizhzhia核電廠遭俄軍轟炸，反應堆外培訓大樓起火，險釀核災。俄軍佔領該核電廠後，再進逼第二大核設施。戰禍、核災憂慮，淡化美國就業數據好過預期消息，「恐慌指數」VIX一度抽高13.7%至34.65。另外，聯儲局鮑Sir重申「不惜一切遏抑通脹」，亦令市場疑慮。
小麥漲價 老麥即加價
港股上周五被淡友借俄軍炸冧防線，失守22000關口，收21905，兩會首日未見中央維穩手影。港股市底偏弱，睇日線圖，10天線加速下跌，20天線又跌穿50天線，保加力通道愈擴愈闊，本周料將弱勢持續，支持位睇2020年3月19日低位21139；若果反彈，阻力位睇上周五下跌裂口頂部22378。本周焦點除咗戰情、疫情，仲有中美通脹數據，中國周三公布CPI、PPI，美國周四公布CPI。
俄烏戰事推高油價、糧價，以至其他商品價格，追蹤23種能源、金屬、農作物價格嘅彭博商品現貨指數，上周大升9%，係1974年9月以嚟最大升幅。單計上周五，以油價、金價、小麥價為例，就分別升6.8%、2%、6.7%；周六，因應小麥漲價，老麥 — 麥當勞日本宣布加價！百物騰貴下，環球央行面對低增長、高通脹嘅滯脹風險，加息步伐兩難，過快恐怕經濟衰退，過慢又怕通脹失控。
銀行中長線 仍有錢途
央行進退失據，睇上周聯儲局鮑Sir出席國會聽證會嘅表現可見一斑。鮑Sir作供時，支持3月加息以0.25厘起步，令市場對激進加息鬆一口氣；但答問環節，佢又重申「不惜一切遏抑通脹」，市場又再起疑慮。不過，短線嚟講，息口趨向明朗，利率期貨顯示，市場預期3月加息0.5厘機會「清零」，加息0.25厘機會達95%。加息步伐暫時窒步，息口敏感嘅銀行股全線跌低。
上周五，滙豐英國股價收470便士，折算每股48.6港元；美國ADR收31.23美元，以1份ADR兌5股計，折算每股48.8港元，兩者都比香港收市價51.5元低超過半成。其實無論國際定本地銀行股，近日都見回吐；滙豐年初至今仍能保住近一成升幅，已跑贏同業。中長線嚟講，戰、疫推升環球通脹，聯儲局每次開會都加息嘅機會仍大，銀行股受惠息差收入增加預期不變；惟短線仍有回調壓力，不急撈底。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
