士佳說 - 張士佳 2022年3月7日

士佳說 - 張士佳 2022年3月7日


【#士佳說 】張士佳：韜光養晦
【#士佳說 】張士佳：韜光養晦


​當你早前覺得香港大部份股票已經超值，但失驚無神遇上戰禍及藥石亂投的港府抗疫，究竟應該掉轉槍頭跟勢狂沽，還是跟教科書的，但凡戰亂濺血街頭，係入市之時? 事後孔明，今次應選擇狂沽，但如果你冇咁做呢？遇着這股突如其來的狂流，如何生存下去？

教科書話一間公司的價值取決於它能否為股東的投資創造利潤，其他如戰亂或疫症根據歷史係短期因素而已，我記得看過中國女畢菲特徐新在霸菱的時候曾大手買入網易，不巧碰上科技股爆破，該股下跌了80%，她很堅持，很多人都笑她，她頂住壓力，四年後賺了八倍；遠的不説，講些較近的，股神搭檔芒格買入了baba，已経下跌了四成，他卻還偶有增持；他鮮有出手，前陣子他一定覺得BABA難得遇上超低價，究意他嬴盡那麼多仗，今次會否滑鐵盧，有待時間去判決。

當然，很多散戶朋友會覺得八倍太遠，我捱不了四成跌幅，跌咁多，我都過唔到明天，更遑論以後日子，加上普京好像癲左咁，港股市就更加好像俄不是攻打烏克蘭，而是攻中環老蘭，日跌六百是等閒事。明白的，長遠是要型持，但又怕朝不保夕。如此情況，我靠的是老生常談的靈活地堅持，兩者看似對立，靈活就不能堅持，堅持又怎會靈活？其實兩者可以並存，這點我以往講過，更幫我在金融海嘯等意外中扭虧為盈，生存過來，今次亦唔會例外，可舉近日的實戰作例以説明之。

我年初已經睇港股以屆超值之時，所以，22xxx/23xxx，甚至224xx都有買，股票為主，並附以期指，只在25000 分兩次獲利了部份，期指無得守，我跌穿兩農曆新年底就平，事後睇當時肯反手就大勝，但我確估唔到普京咁狠，所以其他個股只係且戰且退，只控制住注碼，絶不接掉下來的刀，大市不做上升裂口不做好，選股挑中了些內需，如基建但也踩了些地雷，猶幸早前已無心插柳地押注軍工（我當時冇諗到伊拉克，只係諗住一定有戰禍，做點小對沖），近日軍工股發力，有所幫補；綜合而言，近日不算堅執做好，但算少少堅持樂觀，但少少堅持都要付出代價，等就係等机會靈活一下。

上星期五一個小機會來了，我同一位相識近20年的老學生討論，這位學生本身係四度空間高手，來上我堂，大家都係教學相長，提到21950應該係一個好關鍵嘅位，方法簡單，只係一些心水清的小統計，但就好有作用，如當日能升穿21950，有強力反彈，否則就係阻力所在，當時仲未去到，結果不偏不倚21950後來就係最高位，臨收市仲反彈番到挨近21950偏高位置，加上呢兩日港大市弱過藥煲，美期彈時都唔跟，正係我機前有危，屬於低風險的沽出好時機，剛好有些學生群組問到，反正有位有波幅，遂臨場做些互動，呢啲靈活沽空行動，我只敢做即市，幸運之神眷顧，該晚做了幾次，盈利不錯。

當然盈利幾好，都冚唔番股票的賬面，但一方面，只持個股無衍生，另一方面，注碼巳在可控範圍，偶一游擊動作，成功將持貨成本，進一步降低，股票看長遠，期指爭朝夕，另一個靈活堅持在危機中保持生命力的活生生例子。

現在我仍維繞內需的概念，但如履薄冰，市場本已預期內地疫後重整，所以航空餐飲率先反彈，但近日內地山東上海病毒似死灰復燃，不可不察；反而$400的騰訊，段永平撈底的新東方，曾是群星拱照的碧桂園服務，等破頂可入的航運及啤酒，則無咁受戰爭影響，這些我暫都未持有，在密切監察中。

總括而言，有人很擔心今年港股走勢，但現在一定是未來幾年的低位區域，要笑到最後，一定要在低殘，甚至低處未算低時進塲，只要控制注碼，不心浮氣躁，不妄想一餔發達，方可存活下來，但更不能自棄放負，而錯過低位的部署。捱得過，世界就是你的。

​
士佳說 - 張士佳 舊文

本文作轉載及備份之用 來源 source: http://skycheung.weebly.com