笑到最後｜烏克蘭科技點解咁強（高明）
笑到最後｜烏克蘭科技點解咁強（高明）
俄羅斯侵略烏克蘭，一時之間引起全世界有正義感嘅人憤慨。
俄羅斯侵略烏克蘭，一時之間引起全世界有正義感嘅人憤慨， 亦都令到世界主流嘅人支持烏克蘭人，特別係今次應用科技作出支援，例如透過預訂Airbnb（ABNB）當
作課金烏克蘭當地人，實際上唔會去住；又或用加密貨幣支持當地政府等等。
美股、外匯、加密貨幣免費即時報價，自選投資組合獲取相關新聞提示。
本欄係講美股科技股，戰事持續幾日，收到睇開圖表嘅一個供應商Koyfin一個電郵，原來大部份成員都係仲喺烏克蘭。稍為一諗就會發覺，烏克蘭對世界軟件科技嘅貢獻比想像中大啲。
同其他都有好出眾科技嘅國家唔同，例如荷蘭，有ASML（ASML）、蜆殼、Airbus、ING等等，荷蘭分散喺唔同領域。一拎上手對世界嘅貢獻，烏克蘭喺軟件上集中地強，用過嘅有Whatsapp（已易手）、Signal、Grammarly、Restream，未用過又已經成名嘅更多。實際上，外判寫軟件程式畀烏克蘭人原來已經喺行內發生咗好多年。情況有啲似台灣強喺半導體上，烏克蘭就係軟件。
國策主打科技
探究原因，原來從事科技係烏克蘭國策。過去已經有唔少排名講烏克蘭係外判科技嘅前列。IT雖然係去人化嘅行業，但IT本身又需要大量人材培訓先成事，烏克蘭每年有超過兩萬名科技相關科目畢業生，大學又直接同企業合作，未畢業已經有Intern甚至Offer。
烏克蘭整個IT及軟件人材達20萬人，全世界第四多嘅科技人材庫，SkillValue評估烏克蘭工程師分數達91.26%，係世界第一，軟件團隊亦達88.7%。當然，最大誘因，就係平，烏克蘭外判工程師時薪25美元至49美元，低過平均嘅60美元至100美元。可以話個良性循環就係，平—>多Jobs—>技術好咗 —>更多Jobs。
有打仗嘅地方科技好似就會有局部優勢，以色列係一例，烏克蘭又一例，近日國際講更多嘅台灣又係一例。而烏克蘭軟件特別勁，可能因為成日打仗，資本密集一嚇就渣都冇，不如整軟件，放曬上雲，一部電腦可以搞掂曬成間公司業務。
以色列係科技股投資概念之一，事實上，烏克蘭亦都應該係其中之一，如果放眼未來，就應該留意烏克蘭嘅軟件企業發展。但係即係烏克蘭咁勁，首先亦要過眼前呢一關，打贏呢場守衛戰，和平之後，優秀嘅烏克蘭人推出更多改變世界嘅產品。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
