平民投資教室 - 錢俊 2022年5月24日

平民投資教室 - 錢俊 2022年5月24日


【平民投資教室】錢俊：少理綠債破發標題黨
平民投資教室
日期：2022-05-24
更新時間：09:26:56

上周港府發行嘅綠色債券掛牌，首日就跌穿發行價100蚊報99.55，每手帳面蝕45蚊，咁好彩抽中曬五手夾埋帳面蝕225元，亦係第一次有港府通脹掛鉤債上市潛水。網上一眾KOL群起恥笑大叫中伏。

的確，美國國債十年期同三年期債息因為加息預期，上周分別達2.78%同2.73%，高於今次綠債2.5%保底息率。由於美國國債被投資者視為無風險產品，既然債息都高過你，點解要買你綠債。同時香港四月份通脹只有1.3%，升高過保底仍有距離，看似潛力較低。

買咗綠債係咪應該揼心口？錢俊認為，視乎你買嗰時嘅初心。如果你借孖展嚟買，為咗慳息，要及早掟貨止蝕，當然係慘。但如果純粹買嚟收息，或者喺出面市況風高浪急嘅情況下泊碼頭，不失為一個好選擇。

首先，一般市民不能用美國國債嚟比較。買港府綠債，免曬申購費存倉費贖回費，而且只係最多五手得五萬蚊貨。如果直接買美債，除咗要計算以上雜費及傭金，又要去開離岸債券戶口（除非你係私人銀行客戶可能唔洗），而且入場費可能較為高昂。

至於買債券ETF間接持有呢？咁就要面對債價升跌問題，由於ETF係基金，唔會有到期日，而投資組合係會不段買賣貨，基金淨值一定會有所升跌。要知道呢個環境一般對好多定息債券都係不利，因為加息同通脹都會令投資者要求更高嘅債券收益率，喺債息升債價跌嘅不變定律下，回報自然變負數，因此三年後無保證你回報一定嬴。

此外買綠債更重要嘅優勢係流動性。現時定存息率不但仍然比綠債底，仲要將你嘅資金鎖死一段時間。反而綠債可以隨時買賣，賣咗一兩日資金就可回籠，若果見股市好轉，就可以隨時換貨出擊。

好多機構投資者可能會想將自己投資組合加入更多綠色元素嚟漂綠，而且當香港未來放寬更多社交距離措施同開關，通脹上升空間比下跌大得多。喺大批孖展客掟貨之後，綠債價格不久之後有望回穩。諗住破底溝貨用嚟泊閒錢，或者比買貨幣基金更加可取。

VTIP：美版抗通脹債券
港府綠債同iBond以外仲有咩抗加息通脹選擇？由於加息同通脹喺短時間內都仍然存在，因此宜選擇對息口較為唔敏感嘅債券，包括年期較短或浮息債券。

Vanguard Short-Term Inflation Protected Securities ETF （US:VTIP）正正投資年期少於五年嘅美國財政部抗通脹債券，平均存續期只有2.6年。年管理費為0.04%，規模達613億美元。由於係美國國債，幾乎係無爆煲之憂。過去一年受通脹加息陰霾所累，股債市無一倖免，但VTIP回報有近3%，絕對係避風港。然而，數字上雖然比港府綠債2.5%要高，但計及稅項同交易費用等，可能只有2%左右，喺呢一點上揸綠債可能仲劃算。

想聽其他投資Topic？話我知：chinjun.column@gmail.com

FB: chinjun.etf
IG: chinjun.column
以上觀點僅為個人分析，並不構成任何投資建議。

平民投資教室 - 錢俊 舊文

本文作轉載及備份之用 來源 source: http://hksmedia.com