【平民投資教室】錢俊：儲蓄保險伏位多
平民投資教室
日期：2022-05-31
更新時間：08:44:37
近期股市波動，有同事問錢俊，好唔好買短期儲蓄保險，聲稱保本兼有保證派息。錢俊唔係保險專家，但可以用投資角度去佢分析嚇。
粗略喺網上了解，呢類型儲蓄保大約要投資三至五年，回報每年
由2%至3.5%不等，大多以美金投保，都有部份可以選擇港元或人民幣，最低投保額主要由一萬蚊港幣到一萬蚊美金不等。
分析離唔開去睇風險與回報。風險方面，雖然標榜保本，但由於唔係做銀行存款，唔受存款保障基金保護。另外，大多呢啲保單都係投資一籃子債券以實現相關回報，但買咗乜嘢就只有保險公司先知。若果遇上金融風暴，債券一樣爆煲會違約。只能說回報愈高，出事機會就會較大。
回報方面，可以同其他投資比較。上周講過今年美國國債息率上升，現時十年期債息已達2.74%，而港府發行嘅綠色債券則有2.5%嘅保底息率。由於兩種債券嘅違約風險可說是零，因此如果儲蓄保回報低於呢兩個數字，肯定唔吸引。
另外仲有一點要注意，就係資金流動性。投資會係年供、月供、定一炮過買曬？若果有臨時財務需要急需現金周轉，能否退保提早贖回？資料顯示有啲計劃首年退保要罰成30%，即係幾乎係買咗就唔走得。
市面上投資產品好多，其實唔一定要買呢類保險。比如綠債或債券ETF，買幾多手豐儉由人，而且買咗啲乜又清清楚楚。加上又可以隨時買賣cash in，好過逼你坐幾年，錯過股市入市機會事少，有急事周轉不靈事大。
3134：光伏中國 時機來臨
港美股市上周都有所反彈，喺中國國務院早前召開「全國穩住經濟大盤」會議後，市場憧憬人行繼續實施降準等貨幣寬鬆措施，多管齊下穩住疫情經濟。同時新能源相關板塊升幅更為顯著。月初有報道指國內沙漠地區正規劃建設4.5億千瓦大型風電光伏基地，有8500萬千瓦專案已經開工建設，刺激相關公司股價反彈。
南方東英華泰柏瑞中證太陽能產業ETF（HKG: 3134）成為其中一隻受惠ETF。過去一個月升14%。基金上年六月先成立，追蹤中證光伏產業指數，投資50隻股票，絕大部分成份股都係大陸A股，涵蓋太陽能（大陸稱為光伏）產業鏈相關股票，業務範圍包括矽片、電池、電纜、光伏玻璃、支架、電站等。
由於中國致力減低碳排放，新能源項目為重要國策。現時中國太陽能佔全國發電量僅為3%，但有報告指出到2050年將增加至39%，因此大有增長潛力。基金一手大約係900蚊。管理費每年達0.99%。
由於投資單一行業，政策改變導致行業股價波動嘅機會高，宜短炒獲利後再投資較為分散嘅市場指數或收費較低又涵蓋更廣泛新能源板塊嘅ETF。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
