陸羽仁 - 下半年宜炒內地股｜金融High Tea
Previous Next 港股6月份相當精神，昨日又升510點，升幅2.4%，重上22000樓上，不少股份都造好，港交所（388）在藍籌中表現突出，市場解讀為迎接中央7.1賀回歸。
美股杜指上周五大升823
點升2.7%，A股昨日再度高收升0.9%。中環茶友話題係港股近日表現咁好，是美國帶動？A股帶動？抑或真係回歸25周年前炒上贈興？
港交所炒7.1沖喜爆上
股市炒作，好多時不需要真正理由，最重要是有資金落場，7.1前港股造好，適逢有人拋出「贈興論」，聽落就覺得有玄機。現在市場仲係揣測緊國家主席習近平會不會親臨香港。陸羽仁收到風，習主席6月30日來參加活動，但回深圳過夜，7月1日早上再過來出席回歸慶典加新班子就職。
有人話因領導人親來走去推斷會否有益香港措施。陸羽仁認為呢個舊思維，按常理如果能夠幫到香港，無論領導人是否親來都會做，所以炒有措施贈興，只係大戶用來炒作的助燃劑。
至於港股升要歸功外圍抑或A股，其實比較中港美三地股市走勢圖，已經睇到。美股上周雖然反彈，但打從收水之聲響起，杜指形成一級級向下，韻律係議息前大跌，議息後大約一個星期開始反彈，每次彈幅大約是跌幅一半，形成一個完美的下降軌。如果港股係跟美股，都只係似熊市反彈。但調過頭睇A股上證綜指，走勢相對強健，特別係4月底見了疫情底2860點後，依家上返到3379點，低位直線升了18%，回升力度相對強，走勢上係一個見底回升格局，所以講帶動力，A股應該比較強，由此估計下半年炒本地掛牌的內地股會比較容易。
由於美股與內地股市都受通脹高企同利率向上的影響，特別係美股仲未擺脫熊市威脅，現時買股不要期望個市大幅攀升，就算內地放水、A股向好可以拉動港股，過程都會上上落落，所以遇著大升市或持有股份急升，最好係先食一食胡，落袋先係實際，等美國急插帶動港股回吐時再撈返。
恒指重上22000關，收造22229點，急升510點；國企指數收報7816點，漲187點，成交增至2000億元。大股中表現出色的主要都是同內地相關股份，香港公司中，港交所最威水，大升7%，收造400.2元。過去中央沖喜送大禮，好多都同金融股市有關，好似港股通、理財通。不過，之前理財通雖然已經亮了綠燈，但實際操作仍有很多地方要解決，最主要係政策推出後地緣政治同國際金融風險增加，內地都要防止資金大量流走，所以如果真係有政策益港交所，或者再炒7.1概念，有機會就考慮部份食胡先。
其他表現亮麗股份都係內地股，科企普遍表現不俗，小米集團（1810）急升12%，收報13.74元； 京東（9618）急升6%，收報265.4元；阿里巴巴（9988）升3.7%，收報118.1元；美團（3690）急漲3.5%，收報205元。
其他中資股安踏體育（2020）急升8%，收報95.95元；李寧（2331）升5%，收報70.9元。強勢股比亞迪（1211）升近8元報318元，逼近歷史新高，同系比亞迪電子（285）大追落後急升15%，收報23.2元。比亞迪電子主力生產手機及電子產品，受晶片供應短缺影響股價大插，現在資金愛屋及烏追捧，主要是看好其科技實力及母企支持，但行業景氣暫時未至，就算看好都只宜候低吸納。
大股東不斷減持騰訊無運行
升市中，騰訊（700）斯人獨憔悴，皆因其南非主要股東Naspers將於場內出售集團所持有騰訊股份，以籌集Naspers及其子公司Prosus股份回購計劃所需資金，公告仲表明將無上限、長期、有序地出售所持有的騰訊股份，並且聲稱獲得騰訊支持。Naspers提到，集團預計每天出售騰訊股份數目將佔每日平均成交量的一小部份。以過去3個月為例，Naspers每天出售騰訊股份平均不會超過每日平均成交量約3至5%。騰訊股價逆市跌1.6%，收報378.2元。
陸羽仁
金融High Tea - 陸羽仁 舊文
本文作轉載及備份之用 來源 source: http://hd.stheadline.com
