【平民投資教室】錢俊：反向ETF便是皇道?
平民投資教室
日期：2022-07-05
更新時間：09:21:27
2022年話咁快就過咗半年。對投資者嚟講應該大多不堪回首。全球股市慘淡之餘,連債市都唔受歡迎。仲有咩賺到錢?觀乎香港上市ETF,今年至今做到雙位數回報嘅,除咗之前介紹過嘅兩
隻原油ETF同礦石ETF,其餘全部係反向ETF。
喺香港上市嘅反向ETF選擇都唔少。除咗大家熟識嘅恆指國指,仲有恆生科指、美股標指500同納指100;A股就有滬深300同A50,甚至連台灣股市都有。有啲ETF做埋反向兩倍,投入一半成本就做到同樣投資效果。以納指100為例,年初至今跌近30%,因此兩隻香港上市嘅兩倍反向納指100今年已升超過70%,相當叻仔。
其實睇淡後市策略除咗反向ETF,仲有沽空、買認沽期權(Put)、窩輪、熊證、賣期貨等選擇。但前者好大嘅優勢係較為簡單,投資者基本上將ETF追蹤嘅指數倒轉睇就知回報大概係點,唔洗計平倉槓桿幾多倍咁煩。同時反向ETF都無需投資者如期貨一樣要另外開保證金戶口,只要你有證券戶口就可以輕鬆買賣。因此對小投資者嚟講,算係一個比較容易上手及接觸到嘅熊市工具。最後,好多熊市策略都有到期日,要繼續就要再買過,反向ETF就無呢個煩惱。
然而反向ETF都有其短處。買認沽期權或窩輪,都係用好少資金嚟「小刀鋸大樹」,相比買反向ETF,想沽空一萬蚊納指,至少都要買五千蚊兩倍反向先做到個效果。若果一但睇錯市,期權或窩輪只會蝕曬期權金,但反向ETF就可以繼續蝕落去。而且反向ETF管理費仍然比好多一般ETF高得多。
另外,細心留意細節,幾乎全部反向ETF都表示係以單日指數嘅走勢為基礎。如果你投資反向兩倍,都係以每日回報兩倍計算,如果長揸,假以時日,投資回報或會偏離相關指數累計表現嘅槓桿及反向倍數,造成好大追蹤誤差。
綜合而言,反向ETF適合短線用對沖跌市風險,但宜見好就收。
XYLD:不求回報,只求收息
Global X S&P 500 Covered Call ETF(US:XYLD)亦係其中一個反向ETF以外嘅熊市策略。基金持有標指成份股相關倉位,同時透過賣出相等於倉位嘅價平認購期權賺取期權金。
咁樣做嘅好處係令投資者享有穩定嘅期權金收入。基金旨在每月派息,過去12個月年息率達12%,絕對比好多高息股優勝。而且因為你係投資標指,同時享有分散投資嘅好處。
當然呢個運作就有辣有唔辣。最大唔好處就係你放棄股票嘅升幅。由於你賣出認購期權,等於同人對賭股市唔會升穿現有價位,若果升穿就要用你股票倉位賺咗嘅賠俾人。呢一點睇返表現就知。過去五年由於美股強勢,標指年回報達11%,而XYLD只有5.8%,撇除派息回報,後者更加蝕2.4%。
由於現時好多人都預期美股跌市未完,以賣出認購期權收期權金,可抵銷部份跌市嘅虧損。XYLD不失為現時可以考慮嘅另類防守性策略。
想聽其他投資Topic?話我知:chinjun.column@gmail.com
FB: chinjun.etf
IG: chinjun.column
以上觀點僅為個人分析,並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
