【平民投資教室】錢俊：細價股大上落
平民投資教室
日期：2022-08-02
更新時間：09:04:58
上周雖然美股反彈不俗,但Mirror演唱會事件已搶曬所有眼球。事後唔少人搜尋及分析涉事公程公司,當中至於有兩家為上市公司。其中一家在事後交易日股價雖然跌近5%,但原來股價年初至今已
升三十倍。另一隻周五反而升5%,但過去三年股價卻跌咗七成。
香港有細價股或中小型股價格大上大落係日常事,就算市況平淡嘅交易日中,幾乎每日都有升跌幅超過30%嘅公司。錢俊唔係細價股專家,不過只知大部份香港細價股都係伏嘢。好多時呢啲公司市值都好細,供交易嘅股份數目少,只要一啲投資者有大動作,股價就可以好大變動,甚至可能有力操控價格,若果小投資者輕信消息,就可能中伏,當中包括好多微訊女散貨故事不能盡錄。
但投資者係咪就一定唔好掂細價股?咁又唔一定。固然有公司由細價股起家,慢慢「升呢」成為大價股嘅藍籌公司。而且已經好出名嘅公司股票,大把基金或投行去研究盤生意,時刻都出一堆報告俾人睇。有咩做得好做得唔好,股價都已經反映一切。反而名不經傳嘅公司,街上研究報告少,投資者走漏眼機會大,當佢潛力開始被人發現,你就執到寶。亦有人認為長線投資角度,細價股最終會跑嬴大價股,甚至喺股市築底後一到三年內大多跑嬴大市。
要搵優質細價股,關鍵就係認真研究公司盤數,對行業及公司業務運作了解,切勿單靠消息。然而單係香港上司公司已經有二千二百間,淨係研究市值最細嘅一千間,要返工嘅你未必有時間。倒不如依賴基金或ETF幫你買。
IWM:老牌中小型股投資標準
現今投資市場其中一個中小型股指標係富時羅素2000指數(FTSE Russell 2000),指數囊括美股3000間公司入面,市值較小嘅2000隻股票。雖則話係中小型股,入面公司平均市值都有31億美元,折合港幣為234億港元,比一度貴為藍籌嘅瑞聲科技現時市值180億仲要高。相比之下,美股嘅中小型股一啲都唔小型。
想投資富時羅素2000指數,其中一個途徑係買iShares Russell 2000 ETF(US:IWM)。基金為其中一隻最多人買嘅小型股ETF,總資產達510億美元。年初至今雖然跌17%,但過去一個月已反彈9%,比標指8%為高。
當然以ETF投資中小型股有其短處。以羅素2000指數為例,投資成二千間公司,最大成份股都只係佔投資唔到0.4%,當然好處係分散風險,但就算當中買到未來股王,因為佔比太少,投資都好難賺到好多。加上ETF為被動投資,單以公司市值去揀股,難相應精準地買入優質股。有基金經理管理及龐大研究團隊嘅主動式基金有機會喺揀股上會更有心。
想聽其他投資Topic?話我知:chinjun.column@gmail.com
FB: chinjun.etf
IG: chinjun.column
以上觀點僅為個人分析,並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
