平民投資教室 - 錢俊 2022年10月18日
【平民投資教室】錢俊：ETF管理費平但跑輸係咩概念
平民投資教室
日期：2022-10-18
更新時間：11:15:24
十月環球再次跌市當然令人沮喪。與其自怨自艾，不如趁機睇睇來年點步署，檢視自己ETF投資組合。若果自己對某啲行業或地區指數感興趣，但同類又有好多ETF選擇，應該點樣揀?
首先，要知道自己睇好邊啲嘢，再了解嚇隻ETF投資啲乜。比如同樣都係投資新能源行業嘅ETF，有啲淨係投資某一個板塊，例如太陽能，有啲買埋水力發電、風能甚至核能等。同時有啲淨係買香港或美國上市嘅公司，有啲就持股遍佈全球。點樣揀就睇個人。一般而言，大包圍策略喺分散風險方面較好。但如果你想搏某個板塊或地區跑嬴大市，唔怕承受單一風險，當然係揀專門啲較乎合要求。
此外，ETF嘅規模、每日交易量、以至公司業務穩定性都係考慮因素。部份ETF如果長期無乜人買賣，或者一啲賺唔到錢或成日改變業務策略嘅發行商，隨時會將隻ETF摺埋退市。當你以為買ETF可以長線投資時，佢突然宣佈唔玩，甚至喺市況差嗰陣話要收檔，到時迫你喺低位沽貨就無仇報。較近期嘅例子包括世界第三大ETF發行商之一嘅領航Vanguard結束香港同新加坡業務，令香港唯一一隻追蹤美股標指嘅實貨ETF都要除牌，迫令投資者套現。就算轉投納指ETF或到美國市場買貨，都會造成機會成本同增加交易費用。
至於有幾隻同樣追蹤相同指數嘅ETF，應該點揀好?好多人會關注ETF嘅管理費、追蹤誤差等考慮。錢俊認為最重要都係睇表現。事實上管理費、追蹤誤差等都已經喺回報中反映，要比較幾隻追蹤同一個指數嘅ETF，最直接當然係搵短中長期表現都穩定同較好嘅嗰隻。
7300 vs 7336:同是恆指反向ETF表現卻不同睇一個例子就清楚曬。有兩隻香港上市嘅恆指反向ETF—南方東英恒指每日反向(-1x)(HKG:7300)同Global X恒指每日反向(-1x) (HKG:7336)。兩者同樣旨在提供恆生指數每日反向走勢嘅回報。
雖然7300嘅管理費為0.99%，較7336聲稱嘅0.65%為高，但無論睇過去一個月、一年定三年表現，7300回報為11.8%、33%、20%，都比7336嘅11.5%、30%同14%高。亦即係話無論短、中、長線回報都係7300完勝。大部份投資者都唔係傻嘅，成交額同基金規模當然都係前者跑嬴九條街。
順帶一提，7300同樣有兩隻槓桿兩倍嘅姊妹ETF，包括正向兩倍(HKG:7200)同反向兩倍(HKG:7500)，讓投資者可以用一半本金做到相似嘅投資效果。
想聽其他投資Topic?
話我知:chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
