【平民投資教室】錢俊：美股或面臨終極一跌
平民投資教室
日期：2023-01-03
更新時間：10:28:17
經過去年風聲鶴唳，又嚟到一年之始，投資組合應該點作出改變？錢俊認為，長線嘅投資，應該繼續以美股同中港股為主調。不過分配比例應該如何？
今日先講美國。年尾喺11月經歷反彈後漸見
乏力。雖然12月通脹數字比市場預期低，但數據出爐當日市場大升後於收市時升幅幾乎已全數蒸發。到聯儲局議息後更加係擋唔住下跌嘅力量。
顯然市場炒作美國放慢加息嘅趨勢減退，隨之而來就係擔心經濟衰退。息口高企令企業借錢嘅意慾低迷，加上好多公司預期經濟會差落去，都唔會著力拓展業務，改以防守為主，企業盈利增長自然唔會太好。聯儲局繼續現時嘅鷹派立場可能最終拖垮經濟，美股或仍要面臨終極一跌。
然而唔代表美股今年就注定失敗。當經濟確定衰退，之後就會迎來減息，屆時或會成為投資嘅轉捩點。衰退後嘅復甦往往係投資股票最佳時機，呢個情況或於今年年內出現。畢竟美股大市往績都係適合長線穩定投資，因此投資者可考慮趁低時加倉。
3066/3068：香港終於有虛幣ETF上市
香港證監會去年10月底宣佈准許引入虛擬資產ETF。不到兩個月已經有加密貨幣ETF喺香港市場推出，由近年非常活躍於香港ETF市場嘅南方東英打響頭炮。首兩隻ETF—南方東英比特幣期貨ETF（HKG:3066） 及南方東英以太幣期貨ETF（HKG:3068）已於上月中上市，為亞洲首批與加密貨幣掛鈎嘅ETF。
證監會指引下，香港掛牌嘅加密貨幣ETF只能夠投資喺傳統認可交易所嘅期貨合約，與美股市場類似。上述兩隻ETF都喺投資在芝加哥商品交易所嘅比特幣期貨及以太幣期貨，亦即係唔會直接投資比特幣及以太幣嘅實貨。兩者每手入場費都係一千蚊以內，非常易於入手。管理費方面為1.99%，相比一般ETF可以話係非常昂貴。不過如果一般自己買入實貨，除咗面對一買一賣嘅高昂差價之外，除時面對FTX倒閉等風險導致資產被凍結，又或者因虛幣錢包遭黑客盜用、病毒感染或遺失密碼，導致造成巨額損失。買賣ETF就免除呢個風險及成本。
有利就當然有弊。買期貨ETF，最直接當然有交易對手風險。市況出現異常，可能令期貨合約爆倉，甚或ETF供應商倒閉等等。另外，期貨始終唔係實貨，走勢除咗存在差異，都會有高低水情況出現。
然而綜合所有因素，錢俊都認為ETF比較吸引，由其係加密貨幣本身過於波動，適合較頻密嘅交易嚟獲利，用ETF買賣成本效益都較好。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
