【平民投資教室】錢俊：ChatGPT概念股非必勝
平民投資教室
日期：2023-02-14
更新時間：10:48:36
上星期其中一個熱門話題非ChatGPT莫屬。微軟宣布投資10億美元到ChatGPT，並將加至其搜索引擎Bing後，另一科技巨頭Google都表示將會以自家製嘅相關技
術Bard迎戰。中國科網公司亦不讓美國公司專美，包括百度、阿里巴巴等都相繼公佈將落實開發相關程式，多間公司就即時被市場炒上。
ChatGPT由Tesla老闆Elon Musk有份創立嘅AI人工智能研發機構 OpenAI 開發，屬於人工智能對答工具。用戶只需輸入一般文字或問題，ChatGPT就會透過大數據分析而作出相對應嘅回覆及答案。有唔少用家甚至叫ChatGPT撰寫論文、書信、劇本、甚至程式碼等，效果都質素可媲美專業級。因此幾乎可以話係有問必答，有難必解嘅「AI版多啦A夢」，難怪平台免費開放試用短短兩個多月，活躍用戶已突破一億人。
呢項技術對投資有咩啟示？首先，相關技術可望成為大眾日常生活嘅工具，好似當日搜尋引擎同智能手機面世，又或者依家嘅IG、微訊，現時已經係每個人不可劃缺嘅生存工具。由開發期到業務飽和有好大嘅增長空間，邊間公司能搶佔先機，自然獲利最豐。
有機會自然都有風險。相關技術去到幾遠仍存疑問。科技問題尚容易解決，道德問題成為更敏感議題。所收集嘅大數據，包括用戶嘅資料及使用紀錄等，會否構成私隱問題？同時，程式回答會否面對「政治不正確」批評？曾有唔同用戶發問關於化石燃料嘅應用，分別得出支持與反對兩個嘅答案。尤其全球政治愈走極端，呢類軟件及公司會否得失左右兩翼人士，加上潛在被AI取代嘅職業或群起捍衛自身權益，最終會否引致「炒車」？
BOTZ：投資AI無錢嬴
當然，AI技術用途廣泛，較為成熟及進入使用階段技術，如機械人或智能車等等，同樣包含其中。因此ChatGPT概念外，亦可睇埋 AI其他類別以分散投資。
美國上市嘅Global X Robotics & Artificial Intelligence ETF（US:BOTZ）正正投資AI相關主題，尋找可能從機器人和人工智能技術和相關運用中受惠嘅公司，當中包括一啲涉及工業機器人及自動化、非工業機器人、自動駕駛汽車公司等等。
成份方面，投資43隻股票，美國上市公司佔43%，日本亦佔35%。行業主要係工業生產（40%）、電子技術（24%）、以及科技服務（20%），醫療科技亦佔12%。
雖然AI行業嘅前景無可限量，但投資者似乎仍然對行業前景比較慢熱。以投資回報嚟睇，過去5年BOTZ股價幾乎原地踏步，嚴重跑輸同樣係科技股主導嘅納斯達克指數嘅62%。過去多年主導升市嘅科技巨頭，例如Apple、Tesla呢啲，呢隻ETF都無貨，或者係主要跑輸原因。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
