唔少英國上場嘅公司都考慮離開倫敦，去美國上市。
花旗有份報告，指出英國股市同美國比起嚟，折讓高達40%，令唔少英國上場嘅公司都考慮離開倫敦，去美國上市。例如，建材龍頭CRH（英/美股：CRH）宣布將會將主要上市地點由倫敦轉移至紐約；另一更重要嘅晶片架構公司ARM，母公司Softbank會
推佢上市，但唔會揀倫交所，會直接上美股。
美股外幣即時報價 多國新聞任睇
2020年疫情後遙距工作潮，外賣股大升，Deliveroo總部位於英國倫敦，做網上外賣平台，有報導倫交所力捧英國公司英國上市，該公司於2021年3月31日在倫敦證券交易所上市，成為英國市場上首家上市嘅外賣App。不過Deliveroo股價上市第一日跌30%以上，表現都係一般。亦有說法，如果一開始揀美國上市，起碼食正2021年仲有科技股潮嘅尾水，喺倫敦就冇食得咁正。雖然最終都難逃股價同其他高增長股一齊大跌嘅命運。
另一大家都知嘅台積電（TSM），美股相對台股一直有5%至15%溢價，股神畢菲特短炒台積電，都只會買美股，唔會價值投資走去買台股。
美股有咩好處，正如大家所知：市場深度闊度、多投資者參與、新聞特多、透明度相對較高。其他包括，美元等於錢，其他貨幣等於籌碼，資金管制貨幣等於泥碼，買美股巿直接拎錢去玩，唔使唱，方便同冇滙兌，贏錢輸滙亦得個桔。
美監管規則嚴 莊家難偷錢
好多人冇乜留意，如果再將港股同美股比，美股管理層或莊家「做壞事」嘅後果，遠遠高過港股，香港可能只係公審嚇，罰嚇錢停嚇賽了事，美股輕則罰身家，重則坐監。所以華文社交媒體流行一句話「美國佬一早開鎗」，講法正確，嚴嘅監管規則相對對於小投資者比較著數，莊家偷錢都冇咁易。
結論係買賣股票係冇可能完全由下而上（Bottom Up），英美同樣放上市，都會有唔同反應，並且出現折讓，如果畀你發現一間超優質嘅公司，所有數據都勁過Tesla（TSLA），但佢係一間盧旺達公司，並且喺剛果上市，no offence，but，真係要有新興市場教父級嘅實力先有資格入場，提唔提得走啲錢已經係廿年後嘅市，啲錢入咗去仲有冇記認都好難作準，一陣銀行打嚟話先生麻煩你要親身到剛果一轉先簽名確認股權，你都唔知去唔去好。
講到尾，一個會買股票嘅人，相對其他唔買股票嘅人，究竟有咩分別？一隻股唔得，買賣股票嘅人就會走，冇乜吟沉，純粹用資金投票。一個市場唔得，就直接成個市場放棄，去一個得嘅市場。股市係中心化產品，企業有管理層作為中心，股市有交易所等機構係中心，同加密貨幣唔同。但又因為有去中心化產品競爭，股市呢類中心化產品，未來十年將會更加中心化，就連呢啲英德法日等七國聯軍，都會變成一啲唔太受重視嘅市場。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
