【平民投資教室】錢俊：美國債務上限僵局可以跌幾多
平民投資教室
日期：2023-05-09
更新時間：09:58:41
投資除咗睇公司業績同行業前景，有啲人都會關注國家或市場嘅制度，無論係金融定係政治制度。近年環球投資者對中概股抱懷疑態度可見一斑。
美國市場有更長嘅歷史，是否就一定比較
優越？近幾個星期市場又開始討論美國債務上限。現時國會因民主共和兩黨各自顧及自身政治利益，未能達成共識。若果到政府用盡行政手段而耗盡手頭現金都未能提高債務上限，屆時被投資者視為零風險嘅美國債券就有違約風險。
雖然歷史上並未實際出現過最壞情況，但2011 年美國就曾經喺債務上限問題上陷入類似嘅政治僵局，曾將美國推向違約邊緣，當時美國失去咗債務評級機構標準普爾代表「無風險」嘅最高級 AAA 信用評級。同時亦觸發股市拋售，資料顯示美股標指喺 2011 年危機期間下跌15%，業務受到美國聯邦支出牽連最大嘅股票類別更暴跌25%。
雖然最壞情況出現嘅機會好細，市場現階段仍漠不關心，VIX恐慌波動指數仍然處於低過20嘅水平。但黑天鵝並非唔可能，與其單單搏最後無事，或淨係考慮制度好與壞，不如分散投資到唔同地區，免於沽注一擲仍顯得重要。
PKW：股本回購嘅ETF慳返股息稅
之前講過美國股票或ETF收息嘅問題，包括要俾股息嘅30%。因此令美股公司及投資者更為傾向股本回購多於派息。所謂回購，即係上市公司通過現金等方式，買返一部分自己公司已經發行嘅股票。大部分回購都係直接喺公開市場上進行。當股份公司被回購後，有可能被直接註銷。對投資者嚟講，因為股份回購減少咗公眾持股，若公司利潤不變，每股盈利就會增加，若市盈率能維持與回購前一樣，咁每股嘅價值理論上係會上升；因此投資者有可能以帳面價值上升，取代派息回報，同時慳到一筆高昂嘅股息稅同手續費。
美股市場除咗有派息ETF，都有股本回購嘅ETF。Invesco BuyBack Achievers ETF（US:PKW）正係以此為賣點。基金會投資過去12個月曾經回購最少5%股本嘅公司。主要持股包括投資銀行摩根士丹利、醫藥股莫德納等。成份以金融股為主打，佔21%，其次為消費者服務及零售貿易，各佔約13%。
當然相對於派息真正「有錢落袋」，股本回購有助股價上升只係留於理論。始終股價仍然係受到唔同因素影響，包括市況、公司及行業前景等等。例如喺2018年上半年，麥當勞、美國銀行、摩根大通等公司花咗數十億美元去回購股票，但喺呢段時間，呢啲公司嘅股價都無好大嘅復甦。以PKW嚟睇，年初至今仍跌1.2%，過去五年升47%，相對於美股標指同期升8%同52%，仍然屬於跑輸大市。
想聽其他投資Topic？話我知：
chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
