【平民投資教室】錢俊：防守股不能防守
平民投資教室
日期：2023-08-03
更新時間：18:09:58
港股升市重上二萬點。想乘勝追擊，大家都知買中資科技股。但大家過去兩年經驗都擔心隨時不久就打回原型。想止賺轉倉投資防守型行業有無得諗？
傳統智慧係買公用股。因為無論經濟環境點變，大
家都係要用電用煤氣，而且公司仲可以加價以轉嫁成本俾消費者，因此公司收入或派息都理應穩定。但近年呢招好似唔多湊效。比如疫情前散戶愛股中華煤氣，過去五年已跌47%，連恆指都無咁傷。
另外就係必需品消費股，即係公司生意同經濟好壞無乜大關連，比如係食品、快餐店等等。聽落好合理，但亦都唔係隻隻股涯得住。又睇另一隻過氣股王維他奶國際，過去5年已經跌咗65%，仲差過恆生科指！
至於亦都有人話買房託REIT收息。房託主要投資物業再出租，以派息俾股東。但一隻曾經強勢嘅藍籌股領展又話俾你知，唔係咁易架葉師傅。過去五年又係跌超過40%。
以上三隻喺所謂防守性板塊嘅過氣股王話俾你知，世事無絕對。由其買單一公司，始終面對公司自身問題嘅風險。比如維他奶就曾經因為被國內同胞杯葛而出事。因此就算想轉倉買防守性股票，都宜分散投資，比如買ETF，方可做到真正嘅防守。
MUSQ：經濟好與壞 音樂未崩壞
香港市場中資科技股嘅選擇多得很，但防守性股票嘅選擇就好少。除咗上述行業，好似都無乜得揀。但去到美國市場，就有好多唔同類型嘅證券或公司俾一般投資者選擇。
例如上月初於美國上市掛牌嘅MUSQ Global Music Industry ETF（US:MUSQ ），投資整個音樂產業生態系統為基礎，裡面包括串流媒體服務、內容及分銷、現場活動及票務、衛星及廣播電台等， 基金亦會涉獵音樂設備及技術公司。
喺數碼化、人工智能、社交媒體和串流媒體平台推動下，音樂產業同分銷方式愈來愈多元化同創新。 新嘅盈利方式、付費串流媒體滲透率上升，加上疫情後現場音樂活動重啟，亦為呢個行業帶注入唔同嘅動力。
基金成份股方面包括環球音樂Universal Music、華納音樂Warner Music、Spotify等等。同時基金亦限制單一公司唔投資超過基金7%，因此分散單一公司風險。
缺點方面，MUSQ管理費要0.78%，比一般ETF貴，加上好多呢啲公司增長潛力未必太高，扣除管理費未必有肉食。由於ETF只係掛牌不久，回報同喺波動市況下嘅表現係點，需時再觀察。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
