【平民投資教室】錢俊：BLACKPICK唔解散就買韓股啦
平民投資教室
日期：2023-09-19
更新時間：13:02:59
港股恆指成個夏天都係18000左右停滯，同時美股標指又喺4400未能向前。喺呢個咁悶嘅日子，好多人關注其他嘢，包括韓國女團BLACKPICK喺佢哋世界巡迴演
唱會最後一場時，會唔會宣佈解散。
韓國K-POP文化席捲全球，由騎馬舞大叔PSY到男團BTS及女團BLACKPINK，韓國潮流唔再只係留於亞洲，而係歐美各地對韓國文化感興趣。至於投資市場方面都站穩一席位。以MSCI亞洲日本除外指數睇，韓股佔指數14%，雖然同中國嘅34%有距離，但印度都只係17%。
事實上韓股最出名唔係娛樂公司，反而係硬件以至於半導體工業。由其街知巷聞嘅三星企業，由半導體、手提電話、電視電器等，通通賣到國外。
最近仲有兩件內外因素吸引更多投資者注目。內部因素方面，當地政府近年甚為積極改革金融市場，以令到韓國投資市場由新興市場級別提升至成熟市場級別，與歐美日市場睇齊，當中包括改革派息制度，鼓勵公司喺派息事宜上更進取及讓投資者更有預算等，以吸引更多海外投資者及增加市場流動性。
外部因素方面，中美交惡下好多國際公司唔敢喺中國插旗，而且近年個個投資者都講緊去中國化，以前國際投資者一定有買中國公司，現時好多投資者都清倉中國股票。然而投資者仍然想買新興市場搏升值潛力，退又求其次就投資其他包括韓國在內嘅亞洲國家。
2848：韓股ETF小心單一行業及國家風險
香港要投資韓股選擇唔多。香港上市ETF當中就只有Xtrackers MSCI 韓國 UCITS ETF（HKG:2848）。該ETF喺德國、瑞士、英國及香港多地上市，係實貨ETF，買入MSCI韓國20/35定制指數內嘅公司，現時一手買入價約為5,900港元，管理費約為0.45%。
ETF成份股達102隻，十大成份股當然包括三星電子，已佔基金近30%，另外亦有現代汽車、KB金融等。至於基金表現方面，今年至今升13%，叫做有雙位數升幅。
投資韓國當然有價值，但當然唔可以買曬全副身家。首先當然係單一國家風險，若果國家出事或者政策有咩重大改動，波動性難料。而且韓股始終偏重半導體工業，若果行業需求及產能有變，風險亦唔低，仲要面對三星佔比成份咁大嘅單一公司風險。因此買韓股之餘亦應該買嚇其他地區股票平衡，比如印度股票以金融及通訊股為主，因此可以分散到行業及地區風險之餘，豐富到新興市場嘅投資組合。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
