關志康 - 要「獎金」還是要「獎品」？ | 神耆商機
近日的早茶會上，有幾位老闆對「腐乳名牌」廖孖記食安風波和美國總統拜登退選的新聞有很多意見。一位大前輩分享，廖孖記的傳人面對傳承困境，只屬九牛一毛的案例：「一間腐乳廠都咁多問題，何況你盤生意呢？難怪後生仔冇興趣子承父業。」
時移世易，許多第2代更傾向於實現自己的理想，而非接手家族企業。有老闆話：「唔好話做廠，一般『揼石仔』生意，後生仔都唔想接手。計我話，留『事業』不如留『物業』；既可確保子孫後代『有瓦遮頭』，亦可收租冇煩惱。如果仔女勉強接手生意，『身在曹營心在漢』，結果在自己手上『光榮』結業，被網民標籤或揶揄為『敗家仔』，就真的『名留青史』了。」
上一個年代，一盤生意上了軌道後，老闆便可以舒舒服服。到子女接手，只要蕭規曹隨，繼續「印銀紙」理應完全無問題。然而，一位廠佬分享：「今時不同往日，『貿易戰』影響下，許多工廠怕了美國佬，要搬到東南亞。我60幾歲人幾乎要從頭開始招兵買馬、同官員打關係，真係要有好大魄力。我都唔想戀棧權位、學拜登急流勇退，但邊個可以接？」
另一個有錢人回應：「如果有得揀，我都寧願要物業，事業留返俾我大哥。要『獎金』一定好過要『獎品』。『獎金』係細份啲，但勝在實實際際嘛。『獎品』值多很多錢？有人要就係！你睇人家4代老品牌，一單新聞就全數歸零。」有高人分析：「近年股市欠佳、殼價大跌，但仍見一些香港傳統品牌急急搞上市。你知唔知點解？其實不是進取，而是老闆一把年紀了，一片苦心；萬一子女不想繼承事業，上巿後把『獎品』轉為『獎金』也容易得多。」
健康教育基金會主席
關志康
神耆商機 - 關志康 舊文
本文作轉載及備份之用 來源 source: http://www.stheadline.com
