美國眾議院就一系列涉及中國法案進行審議同表決，以抗衡中國威脅。 (drnadig via Getty Images)
又到「睇息」、「睇水」時間！本周「天字第一號」大事係美國聯儲局議息，本港時間周四淩晨2時公布結果。喺通脹降溫、就業疲弱下，儲局啟動減息並無懸念，問題只係減多減少。利
率期貨顯示，減息0.25厘同0.5厘嘅機會各半，議息前夕仲係「五五波」，頗為罕見。儲局都幾難做，輕手減息，唔代表經濟實係軟著陸；重手減息，則代表有硬著陸風險。如果開首就減息半厘，市場更會認為儲局行動落後於孳息曲線、認為減息唔夠及時，並會加深衰退憂慮。
美股外幣即時報價 多國新聞任睇
美國眾議院 通過28項涉華法案
息率走向影響市場流動性，息息相關嘅股市難免隨之波動。姑勿論今趟儲局減息多少，減息始終可為市場提供流動性，但問題係估值已預先反映減息帶嚟嘅支持；而且現時嚟睇，市場唔止已price-in減息半厘，甚至已price-in今年內減息一厘，將會限制後市升幅。除咗外圍，本周港股「睇水」要睇埋內地，本周一、二內地股市中秋節休市，周三輪到港股中秋節翌日休市，港股通周一至周三暫停，周四復常。北水中秋截流，港股少條水喉，喺缺水下，本周市況趨靜。
本周焦點係美國央行議息，上周焦點則係美國國會「中國周」，眾議院就一系列涉及中國法案進行審議同表決，以抗衡中國威脅，合共通過28項法案，包括：香港經貿辦認證法案、台灣衝突威懾法案、生物安全法案、反制中共無人機法案、結束中國電動車在美國主導地位法案、電池法案⋯⋯等等，中國駐美國大使館批評係「新麥卡錫主義」（麥卡鍚主義源自1950年代美國共和黨參議員麥卡鍚倡議嘅共產黨威脅論）。上周五，美國貿易代表辦公室批准對中國電動車徵收100%關稅，對太陽能電池徵收50%關稅，對鋼鐵、鋁、電動車電池徵收25%關稅。美中貿易戰，隱然硝煙再起。
三大中資電訊商經歷貿易戰、金融戰、美國退市、回歸A股，近年喺「中國特色估值體系」槪念下，備受投資者追捧。 (REUTERS / Reuters)
70關口見支持 中移動終反彈
睇返2018年由時任美國總統特朗普引爆嘅美中貿易戰，7月，美中各向對方輸入嘅價值340億美元商品加徵25%關稅；翌年5月，美國宣布對2,500億美元嘅中國輸美商品加徵25%關稅，中國反制對600億美元嘅美國輸華商品加徵5%至25%關稅；8月，特朗普宣布對餘下3,000億美元嘅所有中國輸美商品徵收10%關稅，中國反制對750億美元嘅美國輸華商品加徵5%至10%關稅；2020年1月，兩國簽署第一階段貿易協議，18個月嘅貿易戰休戰；但喺11月，貿易戰轉入金融戰，特朗普點名31間中國企業指有軍方背景，禁止美國人投資，三大中資電訊商都上榜，並於2021年5月相繼公布喺紐交所退市。
三大中資電訊商——中國移動（0941.HK）、中國電信（0728.HK）、中國聯通（0762.HK），經歷貿易戰、金融戰、美國退市、回歸A股，近年喺「中國特色估值體系」槪念下，備受投資者追捧；不過，「中特估」股份近期回調，當中，最大嘅中資電訊商中移動，早前連跌6日，守今年以嚟嘅上升軌，喺70元關口見支持，上周五終於反彈1.2%，收71.1元。該股現價股息率7厘，預測股息率7.3厘，喺減息周期臨門、貿易戰敲響戰鼓下，不失為穩陣收息股之選。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
