操盤手劄記│華爾街四大幫主 挺儲局抗「侵」（割柑人）
操盤手劄記│華爾街四大幫主 挺儲局抗「侵」（割柑人）
欠債還錢，天經地義；而錢，係包括本金同利息。近排多家地產商陷
入財困，包括新世界發展（017）、英皇國際（163）等。新世界成功完成882億元再融資，但日後要孭高息，據摩根大通估計，該公司總負債逾1,800億元，每年利息支出介乎80至90億元，佔經常性收入一半。至於英皇，傳聞已為166億元銀行貸款尋求延期還款，亦曾提出以商用物業作再抵押；市場估計，若以物業做二按，每年利息增加過億元。個個債仔都想畀少啲利息，但息率唔係債仔話事。
美股外幣即時報價 多國新聞任睇
想炒鮑威爾 特朗普TACO再現
全球最大嘅債仔係美國，截至今年3月底，美國國債達36.2萬億美元，佔GDP近121%；上個財政年度國債利息支出1.12萬億美元，今個年度有多無少。今年1月重主白宮嘅特朗普，就多次批評聯儲局主席鮑威爾太遲減息，上月起更幾乎隔周就鬧，上周又鬧：「每1個百分點，就讓我們多付3,600億美元⋯⋯現在是4.5厘，為甚麼我們要付這麼多？」特朗普過往除咗嘲諷飽威爾係「Mr. Too Late」（太遲先生）、「major loser」（大輸家）、「numbskull」（笨蛋）、「knucklehead」（傻瓜），更多次揚言要解僱佢，據報上周就想以聯儲局翻新超支為由炒佢，隨後又否認，但稱「不排除任何可能性」。
特朗普話炒唔敢炒，不離兩大原因：①總統權限——據1913年《聯邦儲備法》，聯儲局係獨立機構，理事會主席只會喺合適理由下先會被免職，例如瀆職，難以政策睇法分歧為由免職。②聯儲局獨立性——聯儲局具有貨幣政策制定同執行自主性，確保總統無法直接操控。有「華爾街一哥」之稱、美國最大銀行摩根大通CEO Jamie Dimon就警告，聯儲局獨立性絕對重要，幹預往往有反效果；該行又出報告，指任何削弱聯儲局獨立性嘅行為，都可能增加通脹風險，推升長期利率，拖累經濟活動，惡化財政狀況。高盛CEO David Solomon、美銀CEO Brian Moynihan、花旗CEO Jane Fraser亦幫腔，捍衛聯儲局獨立性。
特朗普緊張美國國債，但幹預聯儲局獨立性有損該局公信力，可能動搖支撐全球金融市場嘅美國國債同美元地位，所以佢再次上演「TACO」（Trump Always Chickens Out）臨陣退縮戲碼，金融市場亦隨著呢場炒鮑風波而波動。雖然特朗普想減息，但美國上月通脹升溫，CPI按年升2.7%高過預期，反映關稅對物價嘅影響逐漸浮現。利率期貨顯示，聯儲局7月維持利率不變機會高企93.6%，9月減息0.25厘機會亦由之前67%跌至54.2%。
恒生高息股ETF 個個月派息
聯儲局對減息似乎採拖字訣，食息族對減息則宜未雨綢繆。除咗收息股，高息ETF亦可諗，香港上市嘅高息ETF，最為人熟悉嘅係盈富基金（2800），現價息率3.32厘，每半年派息；仲有每半年派息嘅如GX恒生高股息率ETF（3110）、博時央企紅利ETF（3437），現價息率分別為5.6厘、7.24厘；每季派息嘅如富邦滬深港高股息ETF（3190）、恒指 ESG ETF（3136），現價息率分別為5.54厘、1.84厘；每月派息嘅如恒生高息股ETF（3466），4月上市以嚟平均每月每單位派息0.1元，以此推算，現價預測股息率6.85厘。
不過，要注意嘅係：①高息ETF價格可升可跌；②高息ETF派息並不保證；③雖然派息愈密，愈能提供穩定現金流，但每次派息，證券商或銀行都會收手續費，一般每次都要30元，呢條數要計埋啊！
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
