大師冇點你│私有失敗大跌 迪生博唔博？（李聲揚）
大師冇點你│私有失敗大跌 迪生博唔博？（李聲揚）
ty Images) · TED ALJIBE via Getty Images
本欄寫過幾次港股私有化。主要原因係：本欄星期一刊出，而似乎好多公司都鍾意揀星期五做私有化表決。之前寫過嘅金利來（0533.HK），金朝陽（0878.HK），都係星期五開會，然後齊齊撻Q。另外，譚仔（2217.HK）就6月30號開會。而七一正係紅日。似乎真係好鍾意放假前開會，不過譚仔係成功私有化嘅。
廸生創建 而家買定差唔多....
新鮮滾熱辣？就係本欄都寫過嘅廸生創建（0113.HK），上星期五（7月18日）開股東會同上法院，結果又係撻Q被否決。特別留意，今次否決，就只係「爭些少」。詳情唔解太多，但大家都聽過私有化要「過三關」，廸生就剛剛好多過10%反對票，有10.16%，只係多咗少少，相信潘廸生再好脾氣，應該都媽媽聲。
今日（星期一）嘅股價，當然會大跌。但會唔會「打回原型」，跌返去未宣佈私有化前？又應該唔會。因為首先港股都回升不少，點都要跟返些少。
另外，私有化衰咗，一年內不能重啟。但一年後呢？而家買定差唔多。特別係今次廸生創建只係爭少少就成功，有理由相信大股東應該幾大誘因下年又玩過。
事實上，睇返金利來同金朝陽，撻Q之後嗰日股價當然大插，但之後都係穩步上揚，兩隻由當時低位都升返近10%。
另外，廸生嚟講，仲有一樣嘢留意：公司會唔會派特別息？
因為是咁的，公司3月尾年結，咁之前當然出咗全年業績，但冇派末期息。合理嘅，因為到出全年業績時，公佈咗私有化啦嘛，一般都唔會在呢啲時間派息，搞到件事太複雜。
但而家私有化已撻Q，好啦，潘廸生同成家人都要開飯的嘛，係咪？公司3月底年結，中期業績9月尾，11月先出業績，派得息嚟都可能2026。等唔等得到呀？
當然你可以話，名牌潘大把錢，邊似你啲窮作家咁要靠收股息。但真的嗎？如果係咁，廸生使乜年年派高息？就係為咗益我呢啲窮作家？
無論如何，我估私有化下年再做嘅機會大。但而家撈唔撈？我代唔到你決定。我就唔會，因為冇錢。當然亦都可以睇定啲，睇埋11月嘅中期業績先。始終公司做高檔零售，業務真係相當麻麻，就睇下見底未。
循例睇返上次嘅全年業績（2024年4月至2025年3月），收入同盈利大跌都預咗。但最重要嘅係：銀行現金仲有33億，爭銀行6億，淨現金27億- 其實冇少到（亦因為冇派末期息）。唔止，仲拎住10億金融資產，主要都係債券同股票。
27億淨現金，10億金融資產。而家市值20億.....其實係抵搏嘅！但我就等遲啲先吧。
李聲揚
前大行分析員，如今無業遊民，別人恐懼時我貪婪
FB Page︰meatbonetea金融肉骨茶
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
