操盤手劄記│3.85厘息銀債 成港股程咬金（割柑人）
操盤手劄記│3.85厘息銀債 成港股程咬金（割柑人）
ACE/AFP via Getty Images) · ANTHONY WALLACE via Getty Images
踏入9月喇！股市有句古老諺語：「Sell in may and go away」，呢句後面仲有一句「But remember to come back in September」，意謂股市每年5月左右會轉弱，係時候沽貨，但9月左右又會轉強，係時候買貨。前者時值企業公布財務報表後，投資者獲利結算，對股市形成沽壓；後者時值第四季消費旺季將至，投資者憧憬升市，先行入市布局。不過，9月入場都唔係實贏，唔好忘記「2008年9月金融海嘯」、「2018年10月貿易戰風暴」等事件。今年又點？
美股外幣即時報價 多國新聞任睇
通脹壓力升溫 儲局減息兩難
睇返上周五外圍市況，美國聯儲局睇重嘅通脹指標——剔除波動較大嘅食品、能源價格後嘅核心個人消費支出（Core PCE）物價指數，7月數據出爐，按月升幅維持0.3%，符預期；按年升幅則由2.8%升至2.9%，雖符預期，但為2月以嚟最高，反映通脹惡化，令該局本月減息與否陷入兩難。數據出爐後，美債10年期孳息升至4.24厘；美滙指數98關得而復失，收97.77；美股道指、標指、納指分別跌0.2%、0.6%、1.2%。值得注意嘅係，阿里巴巴（9988.HK）據報已研發出新AI晶片以填補Nvidia（NVDA）晶片難以銷華嘅缺口，該股在美股價績後急升，較港高13.7%，刺激港股夜期抽升，高水241點。
聯儲局會否喺本月中嘅議息會議減息？利率期貨顯示，市場預期減息0.25厘嘅比率仍達84.4%。不斷向聯儲局施壓要求減息嘅美國總統特朗普，上周一晚又有動作，喺自家社交媒體Truth Social發布一封致聯儲局理事Lisa Cook嘅信，以涉嫌按揭欺詐為由即時炒佢，Cook上周四入稟法院興訟，要求裁定炒佢違法，兼要求頒布臨時禁制令阻止訴訟期間被炒，事件引發一場關於中央銀行獨立性嘅爭議！單官司上周五聆訊，法官並未作出裁決。阿Cook打官司，如果打輸，將會係聯儲局成立近112年嚟首個被總統罷免嘅理事。而聯儲局7人理事會中，計及上月請辭嘅Adriana Kugler，將有5人係由特朗普任命。
銀債息率吸引 抽走股市資金
減息遲早成事，對股市係利好因素。然而，上周五港股喺三點半後升勢戛然而止，完場升幅少一大橛。發生咩事？當日三點半政府公布新一批銀色債券（供60歲或以上港人認購嘅債券）發行細節，唔關事就假！呢批銀債發行額500億元，可加碼至550億元，保底息3.85厘，浮息同最近6個月通脹掛鈎，以較高者為準，半年派息一次，年期3年，每手10,000元。以發行額達550億元計，相當於一隻大型股份嘅集資額，加上3.85厘息具吸引力，相信會抽走股市唔少資金！
今年呢批銀債保底息3.85厘，雖然比上年嗰批4厘息、前年嗰批5厘息為低，但比香港3年期政府債券孳息2.174厘、美國3年期國債孳息3.584厘為高，同美國1年期國債孳息3.855厘相若。此外，銀債息率亦比港元1年期存款息率約2厘為高。參考上年、前年發行額同為550億元，分別最多獲發24手、23手，若年齡夠秤，又有閒錢，不妨認購25手至30手。若如上年般最多獲發24手，3年合共收息27,720元。庫房未來3年將為呢批銀債付息63.52億元，可視為政府畀「老友記」嘅福利。有興趣嘅話，留意認購期為9月15日至29日。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
