15/10/2026 16:34
《楠楠自語－莫灝楠》今次AI又大震倉？
《楠楠自語》試以幾點解構今次環球AI股大瀉。
1）核心唔係需求突然斷纜，而係市場開始驚班算力同基建公司撐唔住融資。自從Broadcom(US.AVGO)陳福陽同Intel(US.INTC)陳立武公開講A
I融資問題，市場焦點已經由「買增長」轉去驗屍咁驗「邊個借得起、還得起」。
2）Neocloud借錢已經貴到離譜，拎CoreWeave(US.CRWV)做例子，公開高級債票面息約9.6%至9.8%，二級市場yield一度炒到近15%，票面息同實際再融資成本完全脫節。
3）AI基建瘋狂發債吸乾credit market資金，直接扯高曬啲credit spread同風險定價，風險資產要畀更高溢價之餘，再融資個窗口亦愈縮愈細。
4）雖然帳面業績增長仲喺度，手頭backlog亦夠厚，但一旦融資渠道收窄，兼息口長企高位，班友隨時要砍CapEx指引，連帶合約兌現都要拖慢。靠燒錢換番嚟嘅增長，當「錢變得太貴」，就係最大變數。
5）市場最驚資金鏈出現缺口，只要硬件訂單、Data Center進度同客戶找數節奏一有錯配，AI硬件股就好易變成value trap－－帳面增長係靚，但現金流同估值一齊雙殺。
6）高息環境下，資金本來最鍾意抱團買AI硬件、網絡安全呢類「業績確定性高」嘅主題，但問題係倉位已經crowded到爆。一旦風險偏好轉弱，避險資金下一站可以走去邊，市場自己都未有共識。
7）Fund flow已經見到有錢泊入Staple、Utility、Energy、Healthcare呢類防守板塊，短線理論上可以跑贏。但呢堆股本身估值唔平，波幅又細，再計埋10年期美債有5厘幾，走去買得嗰2厘股息嘅美國Staple股，個risk/reward水位根本唔夠頂住個機會成本。
8）喺融資成本未回落、CapEx兌現未明朗之前，寧願提高現金比重，留番啲彈藥，等估值同融資條件一齊改善先再出擊，點都好過喺高集中度、高槓桿主題入面硬食回調－－Drawdown斬倉係痛、係唔開心，但風險管理上都要焗減。《元宇證券基金經理（權益類） 莫灝楠》
*《經濟通》所刊的署名及/或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
選股情報 - 石鏡泉 舊文
本文作轉載及備份之用 來源 source: http://www.etnet.com.hk
