金融High Tea 2012年12月31日
金融High Tea——修正與翻身
2012年12月31日
一年將盡，又是盤點2012年金融市場的時候，看看誰是贏家，誰是輸家。毫無疑問，大力放水的美國是贏家，以中國為首、收水抗通脹的新興市場是輸家。
美國財政懸崖問題今日到期，杜指上周五即跌158點，杜指期貨更跌226點，顯示市場對短期談判結果有憂慮。
以外匯市場計，到上周五止，反映美元兌主要貨幣匯價的美元指數今年至今跌了0.7%，美國這樣印錢，美元仍然無乜升跌，如果唔係歐洲貨幣下半年反彈，美元還要上升，可見美國真係以水淹金山玩謝全球的方式，扶起自己的經濟。歐洲在上半年被人唱到差不到要崩潰那樣，但下半年又好似無事，歐羅下半年反彈，兌元美元今年升了2.2%，歐洲局面穩定番少少。
大國貨幣中以日圓最弱，日圓兌美元今年跌幅排第一，跌了12.4%，不過話說回來，日本經濟咁弱，日圓之前本來就唔應該升到76這種歷史高位，如今跌番落86，只是追跌，明年可能仲有得跌。早前日本五大電子巨頭，市值夾埋都只有南韓三星的四分之一市值，可見日本呢個電子消費品王國都沒落得幾快，日本政府唯有力壓匯價以求追趕。
經濟差勁 股市上升
商品亦唔掂，CRB商品指數今年跌了0.6%，其中黃金到年底力盡回軟，全年只升了6.4%，但原油跌了7.8%。商品無表現與中國為首的新興國家今年經濟放慢有關，儘管美國大印銀紙，但商品實質需求減弱，所以升唔起。
妙就妙在商品升唔起，股票升得起。美股杜指今年升了6%，德國DAX指大升30%，法國CAC指數亦升16.3%，歐美經濟唔好，但股市好好。亞洲區日股升了23%，港股雞雞地亦升番23%，同日本仔差唔多。大國股市中最差係中國，上證綜指成年只升了1.5%，仲要靠最後12月下半月彈吓先至有咁成績(單計上周五已升了1.2%)，否則隨時見紅。唔好忘記美股升幅雖然唔大，但係杜指一度升到接近14000點的歷史高位，但中國股市剛剛仲破緊四年低位，真係天堂與地獄之別。
股市有些時候與基本因素背馳，法國經濟衰到貼地，預計今年GDP增長只有0.3%，日本都唔好得好多，預計只有0.6%，唔好忘記佢地舊年基數已經好低，今年仲要增長得咁少，經濟實質停滯。
反觀中國，今年衰極GDP都有7.5%增長，中國經濟唔好只是相對於自己過去的高增長而言，並非絕對地差。但法、日股市卻可升20%，中國股市的升幅卻以有若無，若然只睇基本因素買股，實會輸死。當然，歐美日股市之升既炒政府放水，亦炒否極泰來；而中國在收水之餘，仲俾人唱佢由盛轉衰，但說到底都係市場錢多或錢少作怪。
兩地房股 大炒翻身
講開否極泰來，無獨有偶，無論美國和香港，今年升得最勁的股份，偏偏又係那些早前衰到貼地的股份。杜指成份股中，升得最勁的是金融股，第一位是美國銀行，今年至今升了106%，佢當日要美國政府救助，今日翻身。升幅第二是家品建材店家得寶(Home Depot)，今年升了45%，排第三的是迪士尼，升了32%，排第四的是摩根大通，升了31%。頭四位有兩隻銀行股，另外家得寶同樓市有關，佢地都係2008年金融海嘯金融爆煲樓市大冧的受害者，如今炒佢哋翻身。順便講兩句，外國投資者睇好環球銀行股調整成功，難怪匯控
(005)今年都升38.6%，由去年底59元升到而家近82元。杜指成份股最差係電腦公司惠普，今年至今跌了45.5%，反映桌面電腦沒落，手機和平板電腦上網興起，呢隻股係倒番轉，炒盛極而衰。雖然聯想
(992)主要做內地市場，在內地桌面電腦仲賣得，但小心聯想都受呢啲負面氣氛影響，無怪乎佢阿頭楊元慶都要減持。
睇吓香港股票，今年表現最好的是中港樓市股，亦係炒翻身。今年十大升幅藍籌中，內地和香港地產股十佔其六，頭四位全是這類股，新世界
(017)全年升93%拔頭籌，第二、三、四分別是中國海外
(688)、九倉
(004)及華潤置地
(1109)。特區政府去年十月首次推出特別印花稅打擊樓市，新世界去年底以5.68元供股，搞到股價跌到7個幾，不過你唔供大股東照供，股價隨着樓價向上大翻身，上周五收12.06元，跟供者賺到笑。
內地走強 美股上落
但講翻身都係內房股厲害啲，若睇埋非藍籌內房股，以獲九倉入股的綠城
(3900)最勁，升313%，融創
(1918)亦升264%，合生創展
(754)升205%。內地大力打擊樓市，大城市對外地人採取限購令，好多財政較緊的內房公司一度有爆煲危機，所以股價跌到地底，到市況稍稍回暖，內房股就報復式上升。話說回來，買翻身股有坐艇風險，呢啲錢唔易賺。
講完回顧講吓前瞻，估計大方向是今年美股跑贏內地股，明年走勢可能倒番轉，內地股跑翻贏美股。老實講最難睇的是美國經濟，債王格羅斯睇淡，認為美國聯儲局搞到QE7或QE8都未掂。但市場不乏睇好者，這也是美元在大放水下，仍然無暴跌的原因。好似德銀最近出咗個報告，就提醒人美國失業率可能比想像中早下降到6.5%這個聯儲局指標，意味美國到時可能會停止放水兼加息。德銀話，美國失業率自2009年正以一個穩定的模式下降中，若此模式持續，失業率到2014年第3季就會到達6.5%。若然美國經濟比預期好，例如明年經濟增長多過2.5%，比現時的2%強，失業率跌得更快，可能在2014年初就達到6.5%的目標。
美股主要因為超低息大水浸所以才會咁強，若然明年經濟轉強，加息兼停止放水的預期出現時，股市反而有調整壓力。若然明年經濟繼續只係2%左右的貨色，不好不壞，估計係一個上落市，杜指好難超越14000點的歷史高位，始終經濟麻麻，炒放水也有盡頭。
內房內銀 翻身有望
反觀內地股市繼續向好的機會較大，關鍵係股市仍在低位，當一切資產都咁貴時，內地股票顯得便宜，說到底上證綜指高位6000點，而家得2233點，雖然升得急可能回吐，但中長線睇仍在低位。習近平總書記上場後，作風務實，目標明確，要在8年後令中國經濟再翻一番，睇佢係有能力之人，講得出應該頗有機會做得到，所以明年中國經濟可以睇好，主要風險反而係區內領土糾紛有擦槍走火之險，而唔係經濟搞唔上去的風險。若今年內地股市差、歐美股市好，明年有望修正此相對走勢，內地股市跑番上前。
若中國經濟向好，內銀股、內房股仍可看好，A股指數基金亦可睇高一線。明年的翻身股應是內銀股，佢哋雖然近期反彈了，但依然係市盈率低、息率高，若中國經濟不會爆煲，內銀仍相當便宜，佢哋的風險是減息可能令息差收窄，但增加放貸應可彌補。
至於內房股可以繼續炒翻身，但升幅將料不如今年。阿爺唔想樓價太高影響民生，但住房和汽車是兩大內需項目，阿爺亦唔想打殘樓市令供應斷層兼影響內需，所以內房股還可看好，佢哋今年升了不少，龍頭內房股只要賣到樓仍可再上，當然敲冷可留意恒大
(3333)和碧桂園
(2007)。恒大地產
(3333)今年被沽空機構香櫞(Citron)狙擊，股價全年只升29%，是內房股中最少，明年有機會再追落後，而內房股升幅排尾二的碧桂園今年只漲44%，在內房股中算少，但佢財務比恒大穩健，唔似中小型內房股咁大上大落。
不過大家唔好一本通勝睇到老，若然上半年初段股市升得太急，可能將升勢透支，所以慢升可以慢慢玩，快升就要食吓胡，最緊要識執生。2013年不會是風平浪靜的年份，更加唔好太大想頭，若然期望個市上28000點甚至30000點，甚至出現大牛市的話，期望愈高，失望愈大。
陸羽仁
上一頁 下一頁
金融High Tea 舊文
延續上周曼聯的話題，可能經過周六的比賽後，當曼聯仍然領先次席的球隊7分，今年贏得聯賽冠軍的機會已高於50%，或者令更多非曼聯的球迷，對曼聯更憎恨。情況就正如金融海嘯後，當高盛仍然屹立不倒，繼續稱霸金融界，不少金融界人士、投資者，當中包括我在內，都會對高盛感到不悅。可是高盛不值得分析、研究的原因，乃是他的背景，獲得美國政府很多支持而成功，反而曼聯在財政問題極其嚴峻下，仍然沒有沉淪，這才是一個令人感到意外及值得探討的問題。 
電郵
列印
獨立觀看字體
