中環在線：曼聯棄亞洲攻美國 - 李華華
曼聯美國上市冇錢又冇面
歐洲國家盃進行得如火如荼，作為球迷嘅華華梗係唔會錯過啦，但唔好以為各大球會最近冇曬動靜喎。近年成日想上市嘅英超班霸曼聯，又再傳會重新啟動上市計劃，不過今次就放棄喺亞洲上市，目的地改去曼聯老闆格拉沙家族嘅地頭美國。
消息人士話，曼聯仲未揀定喺紐交所定係納斯達克上市。今次係「紅魔鬼」近年第二次決定轉上市地點，佢哋舊年諗過來港做IPO，過咗半年又話轉去新加坡集資10億美金，到最後因為市況差將計劃擱置。今次去美國上市，冇面兼冇錢，事關集資額只有5億美金，僅及上次一半。
曼聯家仲未肯就消息發表評論。不過有分析師就覺得曼聯由港、星轉去紐約IPO係倒退，因為佢老闆格拉沙家族本來嘅如意算盤，就係喺亞洲做IPO可以set高個股價cap多啲水，曼聯喺亞洲咁受歡迎，仲可以喺當地搵更多商機。如果去美國上市，曼聯反而會變咗一間唔多人識嘅球會，冇曬霸氣囉！
英超加轉播費七成
樓市有泡沫，就連球市都有泡沫，因為港人最鍾意嘅英超，轉播費又創紀錄。英國天空電視台同英國電信剛以合共超過30億英鎊(365億港元)天價，獲得未來三年(2013至2016)嘅英超賽事英國轉播權，金額激增約七成，創歷史新高。天空電視台每年會畀7.6億英鎊轉播116場賽事，英國電信就每年畀2.46億英鎊播38場賽事。計吓數，每場波轉播費價值港幣7900萬，多過聽晚超級六合彩金額。英超收入增加，各球會肯定花更多錢喺球員薪酬及轉會費上面，但觀眾都要被迫睇貴波呀！
李華華
mailto:LiWaWa@AppleDaily.com
上一則: 光伏商怨美徵重稅
下一則: 中環在線：大壽捐大禮賭王榮膺大善長 - 李華華
中環在線 - 李華華 舊文
