中環在線：CY算盡香港人 - 李華華
過兩日就上任嘅CY噚日公佈新政府班底，最令人意外係佢委任會計師公會前會長孫德基(David)做審計署署長，計埋盛傳會做財政司副司長嘅陳茂波，同埋可能接替方正做證監會主席嘅唐家成，至少有三名會計佬幫CY手，CY認真識計數！
搵會計佬入局合何車
政府一直有搵會計界知名人士擔任公職，好似機管局主席張建東同醫管局主席胡定旭，就係分別來自畢馬威同安永，證監主席方正都係會計出身，CY家直情搵會計佬入政府做嘢，唔知係咪睇中會計佬計數計得盡，合曬佢「合尺(何車)」呢？
華華噚日搵咗幾位David喺會計師公會嘅老友，佢哋全部都話事前完全冇聽過David想入政府，呢次都有啲意外咁話。David本人亦比較低調，謙謙君子一名，最鍾意寫書法，得閒打吓高球。
至於係咪陳茂波向CY提議搵David幫手？口痕友指David來自大行安永，應該唔會同陳茂波好熟！雖然話大家都係會計師，四大同中小型行嘅會計師不嬲都行得好開，係兩個圈子嚟！
其實，退休會計師加入政府或者擔任公職真係無可厚非，尤其係四大會計師，聽講四大要求高層55歲退休，有啲係58或者60歲。呢個年頭，60歲都可以係盛年，要呢班曾經呼風喚雨嘅人就咁退休嘆世界，真係慘無人道。華華有位會計朋友年初嘆咗三個月世界已經頂唔順叫曬救命，結果復出轉行搞基金！
李華華
mailto:LiWaWa@AppleDaily.com
上一則: 中國水務料加價20%
下一則: 中環在線：淩緣庭升呢做非執董 - 李華華
中環在線 - 李華華 舊文
