金融High Tea——送禮效果太短癮
2012年6月29日
■昨日有件奇事，主角係現代美容，集團發完盈喜業績都唔得，昨日遭人「洗倉」，股價勁插24％，收0.95元。
阿爺賀香港回歸15周年送大禮，上日拆禮物包，包括經貿、金融合作等六大禮。不過，例如中港兩地市場互相掛牌ETF產品，都係投資者預料之中，所以對港股票刺激唔係好大。恒指在周三消息公佈當日升195點，昨日差不多打回原形。
昨日期指結算，港股疲態畢露，但大半場仍在死頂，港股承接美股升勢，高開129點，已經係全日最高，逐步打回原形。內地A股高開，之後反覆向下，上證綜指收市更跌穿2200點。港股午後初時頂住，捱到三點後就一洩如注，一個小時內插水近160點，跌到19000點至揾到支持。收市報19025點，跌151點，上日升市好似發咗一場夢咁，幾乎蒸發番晒，大市成交只有419億元。
結算日頂大半場
中環茶友話，大市無以為繼，可以從兩個角度分析，若睇基本因素，可以話送禮只有短暫刺激，回到現實唔係咁爽。昨日拖累大市「臨尾香」的主要係內地金融股，工行(1398)、建行(939)、交行(3328)及農行(1288)都跌超過1.5%。現在近半年結，是內地銀行上交存款準備金時，資金緊張，拆息抽高，阿爺對上一日已用逆回購的方式向市場注入950億人仔，市場開心咗一日又發作，資金緊張，投資者唔鍾意掂內銀股。茶友話，另一個角度可以睇期指結算的影響，過去兩日硬推到19200點的水平，好多時在這個水位橫行，或者有好友想頂在這個位結算，頂到昨日三點攞個結算平均價差不多，之後一放手個市就散。
無論邊個解釋啱，市底仍然弱，股票有乜無名腫毒，可以大插。早前恒大地產(3333)上周遭Citron出報告唱淡，股價一度勁插兩成至3.6元。主席許家印全力反擊，又話啟動法律程序，又自掏腰包增持股份，股價初步回穩，但昨日大市唔係幾就，而家印哥每日1000萬元的增持量，相對於昨日3.3億元的成交唔係幾夠，恒大昨日回跌3%至3.91元。
昨日輪到豬肉股雨潤(1068)中伏，內地傳媒話有投資者上星期發表文章，指根據公司現時預付土地租貸金和財務報表看，懷疑大股東雨潤集團可能挪用上市資金50億。咁重大指控好嚇人，兩潤發言人回應話，提出質疑只是個別投資者極不負責任的做法，所謂挪用50億只是猜測。唔知係唔係兩潤回應得唔夠大聲，昨日股價勁插12.7％，跌到6.51元，以接近低位收市。
發盈喜純利跌離奇事
雨潤由2月中發盈警後，由當時高位14.2元開始急插，之後無好過，現價唔見咗54％，簡直無眼睇。
發盈警後業績唔得股價跌唔奇，昨日有件奇事，係發完盈喜業績都唔得，主角係現代美容(919)，佢昨日遭人「洗倉」，股價勁插24％，收0.95元，皆因公司4月中發盈喜，預期因為收益增加，年度「錄得大幅溢利增長」。但前日收市後公佈全年度純利卻倒退近8%，公司解釋為純利減少「主要源自於本年度收購聖娜集團的一次性行政費用及匯率損失所導致」，但市場並不收貨。
老實講，我都真係未見過公司發完盈喜純利會倒退，無論乜原因，管理層都要背黑鑊，事關現代美容4月10日發盈喜前股價只是1.1元，好消息公佈後慢慢炒高，到上周四最高炒上1.34元，而家從高位跌番29％。信你個盈喜通告入咗市，有無得賠？恐怕呢件事會有手尾喎。
陸羽仁
上一頁 下一頁
金融High Tea 舊文
