中環在線：嫁完女娶新抱純官龍年大喜慶 - 李華華
設計圖片及對白
新世界發展(017)主席鄭家純(純官)過去呢大半年都幾旺，好多喜慶事發生，舊年底搞掂周大福(1929)上市、今年初嫁女，又第二次接棒掌管新世界，仲成功埋到CY堆，聽聞佢今年底仲會娶新抱，三仔鄭志明(Brian)計劃結婚了。
聽聞Brian諗住今年10月拉埋天窗，未婚妻身份比較神秘，好事之徒話29歲嘅Brian係城中後生富貴筍盤，有好多女(性)朋友，除非佢親口講，否則真係唔敢講佢未婚妻係邊位。之前Brian大哥鄭志剛、家姐鄭志雯結婚，都係喺新世界地頭會展同君悅酒店搞，Brian都唔會例外，多數喺番自己主場辦大事。
Brian幫彤叔實福和
除咗搞結婚，Brian應該忙住幫阿爺鄭裕彤睇住福和(923)，福和舊年底爆出有1億款項不翼而飛，之後離奇回歸，再揭前主席兼創辦人梁契權個妹冇通知董事會下就借咗成億畀人，搞到商罪科查到上門。
彤叔前年攞咗9億出嚟入股福和，舊年初又搵埋Brian入福和董事局做非執董，市場當時仲以為隻股好到識飛，令彤叔出錢之餘又搵個孫入去睇住，點知一年唔夠就出曬事，孫仔都睇唔住，早排Brian轉做執董，市場又傳彤叔收起間公司，Brian真係要幫阿爺睇實啲喇。
李華華
mailto:LiWaWa@AppleDaily.com
上一則: 風險較大銀行界潑冷水：易有壞賬
下一則: 中環在線：秦鈺池唔夠票去馬 - 李華華
中環在線 - 李華華 舊文
