金融High Tea——搵最多錢部機提款
2012年7月13日
昨日亞洲區內股市頭暈身熱，只有早幾日跌到死死吓的內地股市反而頂住，上證綜指收市倒升0.5％至2185點，其餘無個市掂，日本跌1.5％、南韓跌2.2％，港股亦大跌2％收場。
恒指昨日走勢醜到極，現貨未開市期指先插，恒指低開半個鐘內跌200、300點，A股午後轉勢向上，亦拉恒指唔上，尾市連19000點都跌穿埋，收市前略為喘定，勉強企於19000點，收19025點，大跌395點。
恒指大跌主要受中資金融股拖累，恒生中國H股金融行業指數大跌2.8%！而罪魁禍首係建行(939)，要講消息早兩日都講過，佢受債仔破產拖累，建行已經連續兩日大插，上日插完3%，昨日再插3.6%至4.75元！不過睇真啲建行債仔破產，即使一毫子都收唔到，都係損失30億，建行的資產超過11000億元人仔，去年盈利亦有1690億元，條數實在影響甚微，但建行這兩日累積跌咗近6.5%，市值就唔見咗近800億元。
地產股成交少難沽
當然，要睇淡可以話建行壞帳只係冰山一角，你點知有無其他勁嘢未爆？內銀股沽開有條路，昨日滿堂紅，工行(1398)及中行(3988)都要插超過2%，交行(3328)及重農行(3618)更跌近4%。
美股等緊有無QE3(第三輪量化寬鬆)患得患失，本已不利投資氣氛，昨日殺到亞洲。經紀張見到個市穿一穿19000點，話係唔係窩輪發行機構專登隊落來殺熊證。我話當然不能排除這個可能，但熊證19000點左右未算多，最密集區在18900點至18999點區域，對下100點即18800點至18899點的區域亦多，若只為殺熊證，都要殺低啲才見肉。
中環茶友有個觀察，話呢一轉隊落嚟，內銀跌好多，正如早前所講，一隊穿咗支持位，就要再深度調整，好似建行，一穿5.1元的支持位，就直隊到4.75元，好似仲未隊完。反觀匯控(005)和一眾本地地產股，仲守到個上升軌，股價仍然相當硬。
茶友有個理論，認為大戶有部署隊內銀，一則易講古仔，話內地經濟唔好內銀可能壞帳多，好易有人信，二則佢哋成交多深度夠，易食大茶飯，地產股成交相對少，例如昨日長實(001)只有2.5億成交，新地(016)傳聞佢官司新聞有變化都係得8.2億成交，但係建行有22億成交，工行18億成交，巨型內銀股池水深好多，錢多提款都容易啲，早幾日沽內銀唔沽其他股，散戶都唔覺得大市跌，到沽夠就發力隊，散戶發現已經太遲。
內銀恐怕未跌完
茶友話，如果真係有大戶有心沽內銀搵食，散戶未驚唔會走出來跟沽，大戶無得接貨平唔到倉。若然如此，內銀恐怕仲有得跌，散戶通常在跌到阿媽都唔認得的時候就頂唔住廚房的熱度，才會識驚沽貨投降，那時大戶才入市買貨平淡倉。以建行為例，可能要4.5元都插穿埋，再深跌才迫到散戶沽貨。
我話內銀氣氛的確弱，阿爺減息息差還要再收窄，本已不利好，再傳有壞帳感覺更差，畀人當成狙擊對象好正常，反正睇死阿爺你要再減息無力反擊。如今揸咗內銀的散戶又唔使睇得太淡，內銀唔會倒閉，呢一浪都未似有驚天巨災，反正早前股價價較高時無沽，就唔好在如此低價時沽貨啦，否則只會成為大戶提款的工具。
陸羽仁
上一頁 下一頁
金融High Tea 舊文
